Tuluk Irakimit iperagaasoq
- 36-nik ukiulik Peter Moore qarasaasialerisuuvoq, ukiullu pingajuata qeqqa ersiortinneqarlunilu, atugarliortitaallunilu qanorlu pineqarnissaminut nalornisitaareerlunilu iperagaavoq, peqqipporli, David Milliband oqarpoq.
Peter Moore Tuluit Irakimi aallartitaqarfianut tunniunneqarsimasoq, Irakimi naalakkersuisut oqaaseqartitaat nalunaartoq, Nutaarsiasaqartitsivik Ritzau allappoq.
Moore Irakip aningaasaqarnermut ministereqarfiani sulitilluni 2007-imi maajimi paarsisuni sisamat peqatigalugit aallarunneqarpoq.
Paarsisut pingasut timaat Tuluit oqartussaasuinut aallarussinerup kingorna tunniunneqarput, sisamaalli qanoq pineqarsimanersoq ilisimaneqanngilaq. Tuluilli oqartussaasuisa ilimagaat toqutaasimassasoq.