Tuluk annerpaamik angusaqarpoq
Tuluk angalatooq, David Hempleman-Adams, nunarsuarmi kingumut annerpaamik angusaqarpoq, tassa qullartaasiani, silaannarmik kissartumik immerlugu qullartinneqartartoq, atorlugu aatsaat taama qullartigigami. Tuluit Nunaanni aviisi sapaatikkut saqqummersartoq, The Sunday Telegraph, ippassaq taama allappoq.
Qullartaat atorlugu qullarnermi maannamut angusat annersaat tassaasimagaluarpoq 9.540 meteri, David Hempleman-Adamsilli tamanna qaangerpaa, tassa 9.900 meterimik qullartigigami.
Hempleman-Adams qullartaasiaminik USA-mi Albertami tallimanngormat qullarnialerami kigaallassaateqarlunilu anersaartuummik kiinarpaqarpoq. Taamaakkaluartorli koorimi ammaannartumiippoq, 60-inillu issimmat pikkunanaarsimassaqaa.
- Tuluk sianilluanngitsoq kisimi koorimi ammaannartumi taamaaliorsinnaavoq, timmisartumiit qullartaasiamik avaqqutsisumiit radiokkut taama oqartoqarpoq.
Tuluk taanna angalatooq Qalasersuarmut siusinnerusukkut angalareerpoq, qullartaasianilu atorlugu imarpissuaq Atlantiku qulaallugu aamma angalanikuulluni.
