Tuluit TV-kkut nangeqattaartuliaanni Kalaallit Nunaat qitiutinneqartoq
Aallakaatitassiap ilaa 2012-imi Ilulissani immiunneqarmat ilaatigut Robson Greenip sunngiffimminni pinialuttartut talliamat unammillerpai. Tamanna ”Robsons Extreme Fishing”-imi ilanngutassiatut takutinneqarpoq. Visit Greenland Kalaallit Nunaanni aallakaatitassiornissanik isumassarsilunilu aallarniisuuvoq.
- Kalaallit Nunaanni sunngiffimmi aalisarnissamik tuluit qeqertaanni najugallit amerlaqisut takutinneqarnerat iluarusuutigaarput. Aallakaatitassiaq taanna, aammali Ice Cold Gold, House Hunters International allallu aallakaatitassiat aqqutigalugit Kalaallit Nunaata tikikkuminarnera pinngortitarsuaq kulurilu ilanngullugit nittarsaanniartarpagut, Anders Stenbakken, Visit Greenlandimi pisortaq oqarpoq.
Aallakaatitassiat Tuluit Nunaanni takutinneqareermata nangeqattaartuliap nunanut allanut takutitassanngorlugu tunineqarnissaat maanna ilimagineqarpoq. Aallakaatitassiat ilaatigut USAmi, Australiami, Afrikami Kujallermi Europamilu nunani amerlanerpaani takutinneqarnissaat naatsorsuutigineqarpoq.
- Ukiuni makkunani TV-kkut aallakaatitassiorniartut amerliartuinnartut saaffiginnittarput, amerlanertigullu Kalaallit Nunaata nittarsaassinnissaanut tapertaasussaasarmata sapinngisatsinnik ikiorniartarpagut. Siunissami TV-kkut aallakaatitassiorusuttut pilerisaartuassavagut, piffissaq sivisooq atorlugu amerlasuunik Nunatsinniit aallakaatitassiorsinnaaniassammata, Stenbakken erseqqissaavoq.
