Tuluit sakkutuuvi Irland avannarlermit qimagutilerput

Tuluit sakkutuui ukiuni 38-ini Irland-imi avannarlermi akersuunnernik sorsunnernittulli pissuseqarfiusumik sulereerlutik Irland avannarlermit qimagunnialerput.

Unnuaru unnuap qeqqata kingorna tuluit politiivi nunap immikkoortuani isumannaallisaarnermik suliaqartut kisimik takussaalissapput.

Tuluit sakkutuuvi 5.000 iusut nalinginnaasumik illersornissamut suliat suliaralugit aqqusinermi takussaasussaapput.

Ukioq 1972 akersuunnerit ingasannerpaaffianni,

tuluit sakkutuuvi 27.000–it Irland-imi avannarlermiipput. Tuluit sakkutuuvisa Irland-imi avannarlermi sulinerat Operation Banner-imik taaguuteqartinneqartoq, augustip aallaqqaataani unippat, sakkutuut Irland-imi avannarlermi suliaannik sivisunerpaamik ingerlanneqartoq naggaserneqassaaq.

Ukioq 1969 katuullit naaggaartuullu akersuunneranni sakkutuut 300.000-it peqataapput BBC-illu tusagassiaa aallaavigalugu 763-it toqullutik.

Tuluit sakkutuuvisa Irland-imi avannarlermi sulinerat nutaaq aggustip aallaqqaataani malunnartinneqassaaq, illersornissamut ministeri Bob Ainsworth oqarpoq. Maanakkut sakkutuut inuiaqatigiinni suliassat nalinginnaasut suliaralugit sulissapput. Maajip qaammataani katuullit naaggaartullu qinikkat naalakkersuinikkut pissaanermik tigusinissamut avitseqatigiinniarlutik isumaqatigiissuteqarput.