Tuluit sakkutuui iperagaalerput
Tuluit sakkutuut umiartortut Iranimi tigummineqartut qanittukkut angerlarsinnaassapput, taama oqarpoq Iranip præsidentia Mahmoud Ahmadinejad.
Iranip præsidentia, Mahmoud Ahmadinejad, tusagassiortunik ullumi pingasunngornermi katersortitsinermi oqarpoq, tuluit sakkutuut umiartortut tigummineqartut, oqalugiarnermi kinguninnguatigut iperagaatinneqassasut timmisartoqarfiliaanneqassasullu. Tamatumunnga peqatigitillugu pisumut atatillugu tuluit naalakkersuisui isornartorsiorpai.
-Tony Blair-ip naalakkersuisuisa tusagassiorfiit aqqutigalugit tusaqqusaarnissaq qinerpaat pisorlu FN-ip isumannaallisaaniaqatigiivinut ingerlateqqillugu, Ahmadinejad oqarpoq.
Taamatut nalunaaruteqarneq pivoq Iranip Tuluit Nunaatalu ulluni arlalinni isumaqatigiinniareernerisigut Irakimilu iliuuseqartoqareerneratigut, Iranimut nassuernertut taaneqarsinnaasunik. Ippassaq marlunngornermi Iranimiu atorfilittaq iperagaatinneqarpoq, aammattaaq Iranimiut tallimat Irakimi Amerikamiunit tigummineqartut Iranimiunit pulaarneqarput.
