Tuluit sakkutuui heroinimik angerlaassisartut paasineqarpoq

Tuluit Nunaanni sakkutuut politiivisa, tuluit sakkutuuinut pasilliutit maanna misissuiffigileruttorpaat.

Afghanistanimi tuluit sakkutooqarfiini, qimmit ikiaroornartorsiortartut maanna misissuitinneqaleruttorput.Tassami Tuluit illersornissamut ministeeriaqarfiata, tuluit sakkutuuisa ikiaroornartunik sakkortuunik, heroininik, toqqortaqarnissaat inerteqqutigaat. Taama pisoqarpoq Afghanistanimi ikiaroornartuerniartartut Tuluit sakkutuui sakkutuut timmisartuinik anngiortumik heroinimik assartuinerarlugit pisuutereeraallu.

- Tamanna Tuluit illersornissamut ministeeriaqarfiata ilungersunartutut isigaa. Allaat ima ilungersunartigisutut isigalugu tamanna sakkutuut politiivinut iternga tikillugu misissugassanngortillugu, Aviisip Politikenip Londonimi ilanngutassiortua Lone Theils oqarpoq.

Tuluit sakkutuui tassaapput, ikiaroornartunik sakkortuunik tuniniaasartut tunisiffigisartagaasa pingaarnersaasa tullii. Taamaallaat nunat allat ikioroornartunik tuniniaasartuinit qaangerneqarsimasut. Tamannami ikiaroornartuerniat namminneq oqaatigereerpaat. Aamma naak illersornissamut ministeeriaqarfiup pasilliutit tamakku uppernarsaatissaqanngitsutut taagaluarai, Lone Theils ima oqarpoq:

- Pasilliutit taamaattut NATOp sakkutuuinit imaluunniit Tuluit sakkutuuinit attanneqarsinnaanngillat. Taamaattumik sakkutuut pisuussuteqannginnerat uppernarneqartariaqarpoq. Pisuussuteqarpatalu inatsisit naapertorlugit sakkortuumik pillarneqartariaqarlutik, Lone Theils oqarpoq.

Afghanistanimi ikiaroornartunik sakkortuunik tuniniaasartut nunarsuatsinni opiumit naatinneqartartut 90 procentii naatittarpaat, opiumilu tassaavoq heroiniliornermi atorneqartartoq.