Tuluit qinersiartukaarrattorsuupput

Tuluit Nunaanni, Skotlandimi, Walesimi Irlandillu avannaani maannakkorpiaq qinersiartukaarrattorsuupput.

Tuluit qinersisalermatali pissanganarnerpaamik siumullu naatsorsoruminaannerpaamik qinersisoqarpoq.

Konservativit, sulisartut partiiat Labour, Liberaldemokratit partiillu mikisut arlallit naggataa tikillugu qinersisartut atugarissaarnerulernissaat sorsuutigaat - malunnarluinnarporlu qinersinerup inernissaa ersernerluttuujumaartoq.

Ilaat aatsaat siullermeerput, qanorluunniillu pisoqaraluarpat Tuluit Nunaanni qinersineq pissanganarlunilu soqutiginarpoq. Qineqqusaarnermi isumasiuinerit imaaginnavipput, qanorli pisoqarnissaa nalunarani, tassa qinersinerup inernissaa iluamik sammiveqarnavianngitsoq.

Partiit angisoorsuit arlaannaasaluunniit amerlanerussuteqarluni naalakkersuisuutitaqarneq tuluit sungiusimasaat pilersissinnaannginnguatsiarpaat, taamaattumillu paatsiveerunnersuaqarsinnaalluni. Inuilli ilaasa ukiuni tallimani Labourimit aqunneqarnissaminngarnit paatsiveerusimaartoqarnissaa soorlu piumanerugaat.

- Tamanna ilinniutigisariaqarparput, arnaq una oqarpoq.

Aammattaarli ilaasa Konservativit soorunami ajugaannissaat neriuutigaat.

Konservativit siuttuata David Cameronip, Downing Street nr. 10-mut nuukkuni neriorsuutigisamininngarnit ileqqaarniuteqarnnerunissaa qinersisartup uuma siumut eqqoriarpaa.

Aningaasanullu tunngasorpiaat ullumi ullormi qinersivimmi qinersisut amerlaqisut eqqarsaataanniikkunarput:

Aningaasatigut torersumik ingerlanngitsoqarnera naalakkersuisunit iliuuseqarfigineqartariaqarpoq, tamannali qinersinerup inernissaata iluamik sammiveqannginnissaa arlalitsigut malunnaateqareersoq pissutigalugu ajornakusuussalluni, soorlu qinersisartut ilaat taama oqartoq. Kikkulluunniit ajugaagaluarpata naalakkersuisunngortussat ilungersuanartorsiussapput.

Tuluit Nunaanni qinersiviit nunatta nalunaaqutaa malillugu ualeru tallimanut matussapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat