Tuluit politiivi: Toqungasut timaat lastbiilimiittut Kinaminngaanneersuupput
Toqungasut timaat 39-t Londonip eqqaani lastbiilimi nassaarineqartut tamarmik kinamiutut innuttaassuseqartuussangatinneqarput.
- Toqungasunit 39-nit arfineq pingasut arnaasut 31-llu angutaasut uppernarsarparput. Taakku tamarmik kinamiutut innuttaassuseqartuussangatinneqarput, tuluit politiivi nalunaajaanerminni oqarput.
Toqungasut Londonip kangiani pingasunngornermi unnukkut nassaarineqartut qanoq qangalu containerimi qerititsivimmiilersimanersut suli nassuiaatissartaqanngilaq.
Nassaarineqartut 39-t containerimi qerititsivimmi, minus 25 gradinik nillissuseqarsinnaasumi qiusimassangatinneqarput. Tuluit aviisii qassiiusut politiinit kinaassutsimik isertuussisup oqarneranut innersuussillutik allapput
AAMMA ATUARUK Toqungasut timaat 39-t Esseximi lastbiilimi containerimik usilimmi nassaarineqartut
Politiit lastbiilimik aquttoq, 25-nik ukiulik Nordirlandimeersoq toqutsisimasutut pasineqartoq tigusaraat. Tamatuma kingorna nordirlandimi illut pingasut misissuiffigeqqissaarneqarput.
Lastbiili Bulgariameersutut nalunaarsoqqasoq
The Telegraphip allaaserisaa naapertorlugu lastbiilip containeria qerititsiviusoq Belgiami Zeebruggemit Essexip umiarsualiavianut pingasunngornerup unnuaani unnuap qeqqata qaangilaaraa tikippoq.
Containerip tikinneranit akunnerup ataatsip missaa qaangiuttoq, tassa pingasunngornerup unnuaani nalunaaqutaq 1.40 missaani (nalunaaqutarput naapertorlugu 6.40) toqungasut timaat nassaarineqarput.
- Nalunaaqutaq 1.40 politiit nalunaarfigineqarput. Lastbiili Graysip qanittuani suliffeqarfeqarfiit akornanniippoq, tassanilu toqungasut timaat paasineqarpoq, The Telegraph allappoq.
Nutaarsiassaqartitsiviit naapertorlugit Mo Robinson, 25-nik ukiulik, Nordirlandimi County Armaghimeersoq lastbiilimik aquttuuvoq.
Politiit misissuinerata maannamut paasivaat lastbiili Dublinimi Irlandimit Walesimi Holyhead aqqusaarlugu Tuluit Nunaannut tikissimavoq.
Ataqatigiimmik aaqqissuussinerit arlaat toqusoqarneranut akuusimasinnaaneranik misissueqqissaartoqartoq pinerluttulerinermi politiit oqaatigaat.
Lastbiili irlandimiut suliffeqarfiannit pigineqartutut Bulgariami nalunaarsorsimavoq.
