Tuluit Parlamentimut qinersissamaarput

Tuluit qaammat ataaserpiaq qaangiuppat sisamanngornermi maajip arfernganni qinersiartukaassapput. Isumasiuinerit upperissagutsigik konservativit siuttuat David Cameron tassaavoq ajugaasussaq.
apriilip 06-at 2010 16:17

Tamanna EU-mi isumakuluutigineqalerpoq. Tassami Cameron pissaanermik tigusissaguni EU annikinnerusumik pissaaneqalersissammagu. Tamanna Europami illoqarfiit pingaarnersaanni arlalinni, aammattaaq nunani konservativiusumik naalakkersuisoqartuni annilaangalersitsivoq, taama oqaluttuarpoq DR-ip ilanngutassiortua Jakob Vinde Larsen.

- Tassami illoqarfiit pingaarnersaanni arlalinni Cameron assorsuaq tatigineqanngilaq. Cameron konservativiuvoq, aammalu Angela Merkel, Berlinimiittoq Nicolas Sarkozy Parisimiittoq taamaattuullutik, taakkuali EU-mut politikkeqarnerat assorsuaq assigiinngissuteqarluni. Isumasiuinerit takutippaat Tuluit Nunaani parlamentimut qinigassanngortittut konservativiusut 40 procentiisa Tuluit Nunaata EU-mit aninissaa ilaasortaanerataluunniit tunngavimmigut allanngortilluinnarneqarnissaa kissaatigigaat. Taamaalilluni Merkelip, Sarkozyp allallu utaqqisaat tassaavoq qinersisoqareernerata kingornagut Cameronip qullersat siullermeerlutik ataatsimiilerpata qanoq sakkortutigisumik iliuuseqarsinnaanera, Jakob Vinde Larsen oqarpoq.

David Cameronip taamatut iliuuseqarnissaanik pasillertut piareersimalinnginnersut Jakob Vinde Larsen aperineqarami akivoq:

- Nammineq partiini konservativiusoq Det Europæiske Folkepartimit anisippaa, taanna tassaavoq Europaparlamentimi konservativit kristumiullu tamarmik kattuffiat. Tunngavilersuutigisaa tassaavoq tyskit franskillu konservativit EU-mi qaninnerusumik suleqatigiinnerat, tamannalu isumaqatiginngilaa, taamaattumillu konservativit suleqatigiinnerat avissaartinniarlugu. Aammattaaq oqarpoq inatsit nutaaq suliariniarlugu, taamaalilluni siunissami EU-mi isumaqatigiissutissat Tuluit Nunaanni inunnut taasissutigineqartartussanngorlugit. Taamaalilluni naatsorsuutigaa siunissami isumaqatigiissutaasartussat atorunnaarsinneqartalinngikkunik annertuallaartuusassanngitsut.