Tuluit nunatsinnit aalisakkanik akitsuuserneqanngitsumik eqqussisinnaanissamut aaqqiissuteqartut

Tuluit Nunaata naalakkersuisui nunatsinnit aalisakkanik nioqqutit aalajangersimasumik annertussusillit akitsuuserneqarnatik Tuluit Nunaannut eqqussisinnaanissaminnut aaqqissuussamik atuutilersitsipput.

Nunatta Tuluit Nunaatalu akornanni saarullinnik raajanillu aappaagu niueqateqarnissamut taama aalajangiipput.

Tuluit Kunngeqarfiata Peqatigiit niuernermut ministeriat Elizebeth Truss nunanut allanut naalakkersuisumut Steen Lyngemut taama allagaqarpoq.

Naalakkersuisoq nuannaartoq

Tuluit Nunaata EU-mit aninissaanut nuna niueqatigiinnissamut nutaanik isumaqatigiissuteqartariaqarpoq. Taamaammat Elizabeth Truss Steen Lyngemut ukiaq allagaqarpoq.

Steen Lyngellu allakkap imaa nuannaarutigaa.

- Saarullinnut raajanullu nioqqutissiarisatsinnut ilaannut eqqussinermi akitsuutit atorunnaarallarsinneqarnissaannut UK-p naalakkersuisuisa aalajangernerat pitsaasuuvoq. Ukiumi nutaami UK-mik niueqateqarnitsinni akitsuutaasut ilai peerallarneqarnissaat iluaquteqassaaq niuerutigisatsinnut ilaannut qulakkeerinneqataassalluni, Steen Lynge tusagassiuutinut taama nalunaaruteqarpoq.

Siunissamut neriulluartoq

Tamannali aaqqiissutaagallaannaasoq naalakkersuisup erseqqissaatigaa. Aaqqissuussineq 2021-p naanissaanut imaluunniit nioqqutissat annertussusaannut killiliussaq anguneqarnissaata tungaanut atuussaaq.

- Suli anguniagarput angunngilarput, taamaalilluni suli suliassaqarpugut neriuutigisatsituut UK-p Nunarpullu akornanni ukiumi nutaami ataavartumik niueqatigiinnissamik isumaqatigiissuteqarnissatsinnut tungaanut, UK-p EU-mi niueqatigiinnermut sinaakkutinit aninerata kingunerisaanik, Steen Lynge oqarpoq, nangillunilu.

- UK-llu suleqatigiinnerput nanginnissaa qilanaaraarput, maluginiarparpullu tulunnit Nunarpullu akornanni suleqatigiinnerput ineriartortinnissaa kissaatigineqarmat.