Tuluit Nunaata Kiina pisuutippaa

Silap pissusaa pillugu ataatsimeersuartoqareersorlu Tuluit Nunaata Kiina maanna avoqqaarilerpaa.
Allattoq Elisa Isaksen
decembarip 21-at 2009 06:45

Tuluit isumaqarput silap pissusaa pillugu ataatsimeersuarneq, Kiinamiut "atornerlukkaat", tassa isumaqatigiissuteqartoqannginnissaata anguniaraluarnerani. Taama isumaqarpoq Tuluit Nunaanni silap pissusaanut ministeri Ed Miliband.

Tuluit aviisianni The Guardianimi Miliband allaaserinnippoq, oqarluni, nunanut inatsisitigut pisussaaffiliisumik isumaqatigiissuteqarnissamut akerliusunut erseqqissarneqassasoq, "nunarsuarmioqatigiit suliniutiginiagaannut akornusersuinerat akuersaarnianngikkipput".

- 2050-imi CO2-mik mingutsitsinerup 50 procentimik appariartinneqarnissaa imaluunniit nunani ineriartortuni mingutsitsinermik 80 procentimik millilerinissaq isumaqatigiissuteqarfiginngitsoorparput. Pineqartut taakku marluk Kiinap itigartippai, naak tamanna nunanit suliffissuaqarfiusunit ataatsimoorfiusumik aamma nuanit ineriartortunit amerlanerussuteqarluartunit tapetrsersorneqaraluartoq, Miliband allappoq.

Aviisimi The Guardianimi allaaserineqarpoq, naak Milibandip Kiina kisiat eqqaagaluaraa, atorfilittaasa oqaatigigaat nunat isornartorsiorneqartut allat tassaasut Sudan, Venezuela, Bolivia, Nicaragua aamma Cuba isumaqatigiissuteqartoqarnissaanut aamma akornusersuisimasut.