Tuluit Nunaat nakkutigineqarnerpaavoq

Tuluit Nunaat tassaalersimavoq nunarsuarmi nakkutigineqarnersaq, tassami innuttaasut sumunnaraluarpataluunniit assiliiviit nakkutilliissutit malinnaajuartarmata.

Taamaattorli taamatut nakkutiginninneq killissaqartariaqarpoq – maannalu qanoq killilerneqassanersoq paasissallugu piffissanngorpoq!

Nalunaarusiami nutaami taama allassimasoqarpoq.

Arnaq inuusuttunnguaq pisiniarfimmut iserpoq. Pisiniarfiup matuani qinnguartaatip scannerip atisai paaseriissavai piniarfiullu iluani ussassaarutit niviarsiannguamut naleqquttut ikittaqattaarneqalissapput.

Soorlu tassa siunissami ungasissumi pisussatut takorluukkersaarusiaq. Kisianni ukiut qulit qaangiuppata Tuluit Nunaanni taamaaleriaannaavoq.

Nalunaarusiami nutaami aamma oqaatigineqarpoq siunissami utoqqaat kiserliornerulissasut, tassami utoqqaat ilaqutaasa utoqqartatik pulaassanagit assiliivitsigut nakkutilliissutitigut nakkutigiinnartalissammatigik.

Tuluit Nunaanni kommissæri, inuit kiffaanngissuseqarnerannik sammisalik, oqarpoq, taamatut nakkutilliinnerup killissaa oqallisigissallugu piffissanngortoq.

Nalunaarusiami oqaatigineqarpoq Tuluit Nunaanni sumi tamaani assiliivinnik nakkutilliissutinik 4,2 millioninik amerlassusilinnik peqartoq.

Assiliiviit nakkutilliissutit nunap iluatigut qimuttuitsut aqqutaaniipput, aqqusinerniillutik illorsuarniillutillu.

Qarasaasianik, kortinik akiliutigineqartartunik, oqarasuaatinik angallattakkanik biilinillu inuit aamma atuigaangamik sumiiffissilertorneq ajornanngillat. Taamalu oqartoqarsinnaalluni inuit atortorissaarutit atorlugit tumisiorneq ajornanngitsut.

Peqqarniisaarniartoqartillugu pinerliiniartoqartillugulu nakkutilliineq pitsaasuuvoq. Nakkutilliinerli ingasaanneqalerpat pasilleqattaannerit pilissasut oqaatigineqarpoq.

Nalunaarusiami oqaatigineqarportaaq Tuluit Nunaat tassaasoq nunarsuarmi nunani nakkutigineqarnerpaaq.