Tuluit Nunaannut saassussiniaraluarsimapput

Tuluit Nunaanni internetimik saassussinissamik Al-qaeda pilersaaruteqarsimasoq, aviisi Politiken allappoq. Tuluit Nunaanni illoqarfiit pingaarnersaanni, Londonimi, qarasaasiaqarfiup saassunnissaanut peqqarniisaarniartartut piareersaateqarsimapput.

Tuluit Nunaanniit avammut, Tuluit Nunaannilu namminermi, niuerneq assigisaalu illumiit niuertut aningaasarsiuteqartullu allat niueqatigiittarfianniit tassanga, tassa børsimiit, amerlanertigut ingerlanneqartarput. Tuluit Nunaanni aviisi sapaatikkut saqqummersartoq, The Sunday Times, naapertorlugu, qarasaasiaqarfissuup qaartartumeernissaa Al-qaedakkut pilersaarutigisimavaat.

Qaartartumeerinissamut pilersaarusiat qarasaasiamiittut Tuluit Nunaata kujasissuani politiinit siorna nassaarineqarput, peqqarniisaarniartartunik politiit akiuiniaqatigiit taamani misissuisimallutik. Naalagaaffiup isertortumik paasiniaasuisa ilimagaat inuit katillugit 1.600-t Tuluit Nunaannut peqqarniisaarnissamut piareersaateqarsimasut.

Londonimi ukiup aappaa avillugu matuma siorna peqqarniisaarujussuartoqarpoq, inuit 52-it taamani toqutaallutik. Peqqarniisaarniarnissat taamanikkumut assingusut ikinnerpaamik arfinillit taamanimiilli pinngitsoortinneqarsimasut, nutaarsiassaqartitsivik Reuters ilisimatitsivoq.