Tuluit Nunaannut nunasisut misilitsittalissapput

Nunasisut oqaatsinik sungiusaatinik Internettimiittunik tusarnaarlutik aallartereersinnaapput.

Tuluit Nunaanni aappariit pissiariilluunniit 40.000-it missaanniittut ilaqutariittut ataatsimuulernissaminnik qinnuteqartarput. Taakku Tuluit Nunaaniinnissaminnut akuersissuteqarfigineqassagunik oqaatsinik misilitsittarneq nutaaq aggustimi atulersussaq angusimassavaat.

Tamatumani ataatsimuulersitsinissaq pineqarpoq, nunasisunut tunngasunut ministeri oqarpoq.

- Tuluttut oqalussinnaaneq ataatsimuulersitsinissamut periaasissaavoq pitsaanerpaaq, taamaanngippammi inuppassuit, pingaartumillu arnat tuluttut oqalussinnaanngitsut immikkoorluinnalissammata, nunasisunut tunngasunut ministeri Daniel Green BBC-mut oqarpoq.

- Malittarisassaq ilaatigut nunami allamiunik katissimanatik aappallit amerleriarujussuarsimanerat patsisigalugu saqqummiunneqarpoq. Naalakkersuisut tamatumunnga atatillugu malittarisassap atuutilerneratigut ukiut tamaasa qinnuteqartartut pingaartumillu aapparisat Indiamit, Pakistanimit Bangladeshimillu kingoqqisut 6.000-inik ikileriarnissaat ilimagaat. Malittarisassalli nunasisut pillugit suliniaqatigiiffinnit immikkoortitsisutut ataatsimoornissamillu toqqaannartumik aseruisutut isornartorsiorneqarput.

Tamanna pisariaqanngikkaluarpoq akisoorujussuullunilu nunasisunillu ilaqutariinnik avissaartitsisuussalluni, taama oqarpoq Tuluit Nunaanni nunasisut atugarissaarnissaannut ataatsimiititaliap siulittaasua Henna Madget.

DR-imit ilanngutassiaq Holger P. Petersenip suliaraa.