Tuluit Nunaanni ullumi qinersipput
Tamatumalu kinguneranik sapaatip akunnerata uuma ingerlanerinnaani ministerit nuimasut marluk tunuarput.
Tuluit politikerii nuimasut arlalippassuit akileraartartut akiligaannik qimmit nerisassaanniit illusisuusaarnernut anngiortumik akiliutsittarsimanerat pillugu ministeriuneq Gordon Brown assut annikilliortinneqarpoq. Gordon Brownip parteeqaterpassui, ilaatigut politikerit nuimasut, siuttortik persaraat isornartorsiortualerlugulu. Ullup ataatsip ingerlanerinnaani naalakkersuisunut ilaasortat nuimasut marluk tunuarput, aappaa peqquserluttarsimanini pillugu aappaali naalakkersuisooqatiminut akerliulluni tunuarpoq. Alaatsinaattut oqaatigaat Gordon Brown ullumi qinersinermi iluatsitsinngikkuni tunuartariaqalissasoq. Allakkakkut E-mailikkut kaaviiaartitakkut Labourimi ilaasortat siulittaasussaminnik qinerserusullutik allapput, tamannalu piviusunngorluarsinnaavoq, taamaalippallu Gordon Brown parteeqatiminit sunniuteqarunnaarsinneqarluni illuartinneqarsinnaavoq, soorlu 1990-imi Margareth Thatcher taamatut pineqartoq. Gordon Brownip partiiata, Labourip, ullumi qinersinermi taaguunneqarluarnissaa ilimagineqanngilaq, taamaassappallu Brown tunuartariaqalissaaq - aappaatigulli Gordon Brown siornatigut annertuumik annikilliortarnikuuvoq persarineqarlunilu, taamaakkaluartorli tamaasa anigortarnikuullugit. Maannakkulli assiigiinngitsorpassuit ataatsikkut pisut, aatsaat taama Gordon Brownimut nakkarsaataatigaat.