Tuluit Nunaanni suna tamarmi uninngavoq
Nunatta annersaani suli issinnerulinngitsoq nunarsuup affaani avannarlermi allani maannakkorpiaq issittorsuuvoq. Tuluit Nunaat eqqugaasunut ilaavoq.
Tuluit appussaapput, taamatummi misigivaat. Sumiiffiit ilaanni 40 cm-imik apisimapput. Mittarfiit matoqqapput, qumuttuitsut ingerlaarnerat taamaatiinnarneqarpoq, atuarfiit hundredelikkuutaat matoqqapput aqqusernillu aqqutissaarpiarnatik.
Ippassaq apilluni aallartippoq ingerlaarfiujunnaariartuinnarlunilu. Suli biilimiittunga aqqusinikkut angallanneq unippoq. Biilimi unnuisariaqarsimavunga maannalu nalunaaquttap akunnerisa aqqaneq-aappassaanni aqqusinermiillunga, lastbiilertartoq oqaluttuarpoq.
Silarlunneratali ajornartorsiutit taannaannaatinngilaa. Gassimik pilersuineq maanna ernumanarsisumik annikillisimavoq kiislu nukissiorneq kissamillu pilersuineq aamma ernumanarsiartortumik annikilluni.
Silarlunnersua issinnersualu pillugit pilersorneqarusuttut nalinginnarmik amerlaneroqaat gassimillu anngussiniarneq killeqaqaluni. Pisortaqarfinneersunit Whitehall-imiittunit tusarfiit nalunaarput gassimik pilersuinerup iluarsineqarnissaa suna tamaat atorlugu naammassiniarneqartoq.
Taamaanneranilu inuit tusintilikkuutaat mittarfinni utaqqipput biilertartullu aqqusinersuarni unnuarli uninngasariaqarput.
Biilit qanoq amerlatiginersut maaniittut kisissinnaanngilakka, biilinulli inissiisarfinnut eqqaanaannarpoq aqqusinernilu takusinnaasara tamarmi tulleriiaarfiuvoq, lastbiilertartoq oqaluttuarpoq.
