Tuluit Nunaanni qinersipput

maajip 06-at 2006 16:01

Tuluit Nunaanni upernaleruttornerani innuttaasut kommunemut qinersinertut taaneqarsinnaasumi qinersinerat ingerlanneqarpoq. Qinersinerup inerneriumaagaassaani Tuluit ministeriunerata Tony Blair-ip tapersersortissat pisariaqartilluarai, tusagassiortoq Emma Laylock DR-imut oqarpoq.

- Illoqarfinni qinersinerni Tony Blair-ip tatigineqarnera annikinnerulersimavoq, ingammik isumasuinerit kingulliit naapertussagaanni. Partiip Labour-ip tatiginassusia aamma annikinnerulerpoq, sapaatip-akunnerani kingullermi kukkuluttornerit kanngunartutut taaneqarsinnaasut ilaat pimmat. Pilersaarutaasimagaluarpoq, nunasisimasut pinerluuteqarsimasulli, 1.000-it paarnaarussaareersimanermi kingorna, Tuluit Nunaannit anisitaanissaat. Sulinermilu kukkuluttortoqarsimanerani paasineqarpoq, Tuluit Nunaaninngaanniit anisitaasussaagaluit Tuluit nunaanniiginnartinneqarsimasut, taakkunanngalu 38-it avatangiisiminnut ulorianarluinnartuupput, tusagassiortoq Emma Laylock oqaluttuarpoq, nangillunilu:

- Aamma Tony Blair-ip ministeriisa ilaat qanittumi paasisaavoq allatsiminut tiingasarsimasoq, tamannalu Tuluit Nunaanni innuttaasunit kusananngilluinnartutut nalilerneqarpoq.