Tuluit Nunaanni qinersineq pissanganarsisoq

Tuluit Nunaanni inatsisartunut ullumikkut qinersinissap pissangassutigineqarnissaa ilimagineqarsimanngikkaluarpoq.
Assi © : Number 10/Flickr Creative Commons
Allattoq Simon Uldum -
juunip 08-at 2017 08:28

Premierministeri konservativeneersoq, Theresa May, qinersinissamik suaaruteqarami sulisartut partiiata Labourip, saamerliusup Jeremy Corbynip 2015-imi siulittaasunngorniuunnermi tupaallatsitsilluni ajugaanerata kingorna suli avissaartuuffiungaatsiartup, ajorsarterujussuarnissaa siunertarigaluarpaa. 

Ullumikkulli, ullormi qinersivimmi, qinersisartunik isumasiuinerit malillugit konservativet  procentpointinut ikitsuararsuarnik siuaqqapput.

Tamanna Theresa Mayip qineqqusaarnerata ingerlanerliorsimaneranik ilaatigut pissuteqarpoq, aammali Labourip siuttuata Jeremyp Corbynip nuannarineqarnerulersimanera pissutaasinnaalluni.

Labourimmi inooqatigiinnut tunngasutigut naapertuilluarnissamik namminersortunngorsaanerullu unitsinneqarnissaanik pingaartitsinera qinersisartorpassuit iluarerpasippaat.

- Konservativet sipaarniarnissamik pisariillisaanissamillu politikkeqarnerat Jeremy Corbynip akerlilersorpaa, tuluit qinersisartut arlallit taama oqarput.

Tuluit Nunaanni qinersisartunik isumasiuinerit malillugit partiit anginerit marluusut ullumi qinersinermi procentpointialuinnarnik nikingassuteqarput.

Ilumullu taamaattoqarnersoq unnugu paasinarsissaaq. 

Qinersisartunilli isumasiuisarnerit Tuluit Nunaanni tatigineqarpallaanngillat, EU-miimmi aninissaq pillugu innuttaasunik 2016-imi taasititsisoqarmat tamatuma inernera arlaannaataluunniit eqqorsinnaasimanngilaa.