Tuluit Nunaanni ministeriuneq ministerinik pingaarutilinnik arlalinnik soraarsitsisoq
Aningaasaqarnermut ministeri Rachel Reeves inatsisinullu ministeri David Lammy, Andy Burnhamip naalakkersuisuini nutaani ilaasortaanngillat.
Allattoq Ritzau
juulip 21-at 2026 08:03
Nutserisoq Jens Thorin, Brian Jensen
Tuluit Nunaata ministeriunerata tullia aamma inatsiseqarnermut ministeriusoq, David Lammy, naalakkersuisuniit tunuarpoq.
Aamma aningasaqarnermut ministeri Rachel Reeves naalakkersuisut nutaani Andy Burnhamip ministeriuneruffigiligaani peqataanngilaq.
Taakkua marluullutik X-imi taama nalunaaruteqarput.
- Naalakkersuisutut sullissiinera nangissinnaasuugukku tulluusimaassagaluarpunga. Naalakkersuisulli siulittaasuata nammineq suleqatissaminik toqqaanissani pisinnaatitaaffigaa, uangalu Andy Burnham naalakkersuisunngortullu sutigut tamatigut iluatsilluarnissaannik kissaallugit pilluaqquakka, Lammy allappoq.
Taanna inatsisinik atuutsitsinermi inatsit imartooq sapaatit akunnialuinik atuutilinngitsiartoq tunuartoq, BBC allappoq.
Parnaarussat inuiaqatigiinni
Parnaarussat tusindtilikkaat Tuluit Nunaanni parnaarussivinni ulikkaaqqasuniit septembarimi iperagaassapput, pillagaanertillu ilaatigut inuiaqatigiinnik sullissinikkut naangisssallugu.
Lammyp tunuarneratigut tuluit nunaat ukiut qulit ingerlaneranni aqqaneq marlussaannik inatsiseqarnermut ministereqalertussanngussasoq, BBC allappoq.
Lammy Keir Starmerip naalakkersuisuini siusinnerusukkut aamma nunanut allanut tunngasuni ministeriuvoq.
47-nik ukiulik Rachel Reeves Keir Starmer ukiut marluk matuma siorna ministeriuninngormalli aningaasaqarnermut ministeriuvoq.
Rachel Reeves X-imi allappoq, aningaasaqarnermut ministeriunini inuunermini immikkut pisinnaatitaaffigisimagini.
- Kingoraartissara, Andy, taassumalu naalakkersuisui sutigut tamatigut iluatsilluarnissaannik kissaallugit pilluaqquakka, aningaasaqarnermut ministeriujunnaartoq allappoq.
- Taakkua tamakkiisumik tunuliaqutserpakka, uangalu naalakkersuisut labourimeersut nunatta pisariaqartitaanik allannguinissaanni sapinngisannik ikiussavakka.
Tunuarnissamik noqqaassut
Aamma inuussutissarsiornermut ministeri Peter Kyle ineqarnermullu ministeri Steve Reed, Andy Burnham siuttoralugu naalakkersuisuulersuni akuussanngillat.
Burnham ippassaq siusinnerusukkut ministeriuninngorpoq. Taassuma Labourimi parteeqatini Keir Starmer, tunuaqqullugu sivisuumik kimigiiserfigisaasoq, kingoraarpaa.
Ministerit Downing Street 10-mi ministeriunerup allanngornerata kingorna kikkunnit kingoraarneqassanersut suli ilisimatitsissutigineqanngilaq.
