Tuluit Nunaanni ministeri arsaattartunut: Akissarsiasi appartikkallarsigit
Tuluit Nunaani Premier Leaguemi arsaattartut coronavirusimik nunami tassani ajornartorsiortoqarnera eqqarsaatigalugu akissarsiaat appartinneqarallartariaqaraluarput.
Tuluit Nunaanni peqqissutsimut ministeri Matt Hancock sisamanngornermi taama oqarpoq.
- Innuttaasut tamarmik ikioqataasariaqarput, aamma Premier Leaguemi arsaattartut, peqqissutsimut ministeri Matt Hancock oqarpoq.
- Inuit maannamut pilliutigisaat eqqaassagaani, soorlu peqqinnissaqarfimmi sulisut pilliutigisimasaat, allaammi tunillanneqarlutik, ilaallu tamanna toqqutigalugu, taava Premier Leaguemi arsaattartartut ikiueqataaniarlutik akissarsiami appartinneqarallarnissaannut akuersisariaqaraluarput, peqqissutsimut ministeri oqarpoq.
AAMMA ATUARUK Premier Leaguemi unamminerit unitsikkallarneqartut
Tuluit naalakkersuisuisa suliffeqarfinnut ikiorsiissutinik aningaasanik ajornartoorfiup nalaani tunniussipput, allaat klubbit annerit sulisui angerlarsinnaanngorlutik, arsaattartullu akissarsiaat taamaaginnarlutik.
- Premier Leaguemi klubbit aningaasarsiornerisa ajornartuunnginnissaat naalakkersuisut ikiorsiissutaasa siunertarinngilaat, tuluit inatsisartuisa timersornermut ataatsimiititaliaata siulittaasua Julian Knight oqarpoq. Nutaarsiassaqartitsivik AFP siusinnerusukkut taama allappoq.
Premier League arsaattartut peqatigiiffiannik PFA-mik isumaqatiginninnialeruttorpoq, akissarsialli appartinneqarallarsinnaanissaannik suli isumaqatigiissusiortoqanngilaq.
Premier Leaguemi arsaanneq apriilip ulluisa 30-ata tungaanut uninngatinneqarallarpoq, tamannalu aamma sivitsorneqarsinnaalluni.