Tuluit nunaanni meeqqat niuerutigineqartorujussuanngorsimasut.

Allattoq Jaaku Lyberth
juunip 12-at 2007 10:49

Tuluit naalagaaffimmi pissutsinut ministeeriaqarfiata nalunaarut saqqummiuteqqammerpaa, meeqqat pinerluttuni niuerutigineqartorujussuanngorsimasut. Meeqqat Tuluit Nunaannut isertortumik eqqunneqartarput kinguaassiuutitigut atornerlunneqarnissaat siunertaralugu.

Danmarks Radiumi nutaarsiassaqartitsivimmi Indiami meeqqat angerlarsimaffiini meeqqat najugaqartut qanoq niuerutigineqartarnerisa ersersinneqarnerannit ullut marluk qaangiutiinnartut Tuluit nalunaarusiaat saqqummerpoq.

Danmarkimi pisimasup aamma tuluit nalunaarusiaata ersersippaa, inoqartoq nunarsuatsinni sanngiinnerpaanik, tassa meeqqanik, iluanaarnissaq piinnarlugu atornerluisartunik.

Danmarkimi pisimasumi meeqqat ilaqutariinni nalinginnaasuni meeravissianngortinneqartarsimasut, tuluit nalunaarusiaanni ajornerujussuarmik pineqartarsimasut ersersinneqarpoq.

Tuluit nalunaarusiaanni oqaluttuarineqarput meeqqat 330-t isertortukkut eqqunneqarsimanerat.

Meeqqat amerlanersaat Kinameersuullutillu Afrikameersuupput. Angerlarsimaffinni inussiaatinngortarput imaluunniit kinguaassiuutitigut atornerluinermi iluanaarniutinngortarlutik.

Meeqqat 330-usut nalunaarusiami taaneqartut oqaatigineqarput tassaasut isertortumik eqqunneqartartut ilaminiinnanngui.

Nalunaarusiami oqaatigineqarportaaq meeqqat niuerutigineqartarnerat pinerlunniaqatigiinnit aaqqissuulluakkamik ingerlanneqartartoq. Meeqqanillu Afrikameersunik eqqussuisartut tassaanerarneqarput tuluusut qaqortunik amillit.

Meeqqat isertortumik eqqunneqartut nukarlersaat tassaanerarneqarpoq qulingiluanik qaammatilik. Aqqanillit aqqaneq-marluk ataallugit ukioqarput, amerlanersaalli tassaallutik niviarsiaqqat inuusuttuaqqat. Tassami taakkua inuiaqatigiinni takussaanerusarput, atortittartutut iluanaarniutigineqartaramik. Nunani piitsuuffiusunit sorsuffiusunillu aaneqartarput, immaqalu ukiuni arlalinni kinguaassiuutitigut atornerlugaareersuusarlutik. Nalunaarusiami oqaatigineqarpoq nammineq piumassutsiminnik aallarunneqartartut. Pinngitsaalisaallutik atortittartunngortitaareeraluaraangamilluunniit, unatagaasaraluarunilluunniit aamma pinngitsaalisaasaraluarunilluunniit Tuluit Nunaannut eqqussisutik annaassisumittut isigisarpaat. Nalunaarusiami aamma maluginiarneqarpoq pisortanit ikiorserneqaraluaraangamilluunniit tammaqqittartut, pisortallu annilaanngatigaat atornerluisiminnut uteqqittarsimanissaat.