Tuluit Nunaanni annertuumik qarsutsineqarpoq

Tuluit Nunaat ukiut 60-it ingerlaneranni aatsaat taamak qarsutsinernit eqqugaatigaaq. Qarsutsinerit pissutigalugit inuit 350.000-it minguitsumik imissaaleqipput ullunilu tulliuttuni siallertuarallarnissaa silasiortut ilimasaarutigaat.

Tuluit Nunaanni sumiiffinni arlalinni erngup qummut killinga appariartulersoq oqaatigineqarpoq. Kisianni ukiuni 60-ini aatsaat taamak qarsutsineqartigitillugu maluginiarneqarpoq.

Gloustershire eqqugaanerpaasimagunarpoq tamaanimi inuit 350.000-iusut sapaatiummalli imermik pilersorneqarnerat matuneqarsimavoq tamaanilu siallileqqinnissaa ilimasaarutigineqarpoq.

Tuluit Nunaanni aasaq manna aappassaa kuuit qarsutsipput, eqqugaanerpaanilu soorlu Gloustershiremi pisortat sakkutuut timmisartortartut ikiorsiullugit imermik minguitsumik qulimiguulimmik pajuttuipput inuillu allamut nussorneqarlutik.

Inuit nussorneqarnerat pissusissamisut ingerlanneqartoq oqaatigineqarpoq, taamaattorli inuit pisiniarfissuarni imermik minguitsumik pilerngullutik parruttarsimasut aamma oqaatigineqarpoq.

Tuluit ministeriunertaavata Gordon Brownip pisut qanoq iliuuseqarfiginerai apeqqutigineqarmat, oqaatigineqarpoq Brown ippassaq ajornartoorneq pillugu assigiinngitsunik ataatsimeeqateqarsimasoq qarsutsinerillu ingasannerit timmisartumik qulangiuaarsimagai.

Kisianni partii Labour aamma ajornartorsiuleratarsinnaasoq oqaatigineqarpoq. Tassami oqaatigineqarpoq immikkut ilisimasallit massakkutut qarsutsisoqarsinnaanera ukiut pingasut matuma siornagulli ilimasaarutigisimagaat iliuusissanillu siunnersuuteqarsimallutik, tamannali Tuluit Nunaanni naalakkersuisut tusaanngitsuusaarsimavaat.