Tuluit ministeriunerat annakannajaarpoq
Ilaatigut Tuluit Nunaanni tamanna annilaarutaavoq tassa talerperliuniat partiitat British National Party EU-parlamentimut marlunnik isertitaqarmat.
Tuluit Nunaanni inuit kamannerat ukiut qulikkuutaartut ingerlaneranni politikkikkut qanoq isumaqarnermi anisinnaveersaarneqarsimavoq, maannali tassa tamanna nunorneqarsinnaajunnarpoq. 100.000-illit British National Party qinersimavaat, tassangaanneerlutalu ingerlaaqatigiissalluta, BPN-p siulittaasua ippassaq taama oqarpoq partii talerperliuniartorujussuaq taanna ippassaq aatsaavissuaq siullermeerluni Europami sinniisuutitaqalermat. Partiit anginerpaat akornanni tupigutsanneqarlunilu maajutsanneqarpoq, partiip konservativiusunit fascistiussutsimik ingerlatsisutut nassuiarneqartartup taamaallaallu kaukasiamiunik qaqortumik amilinnik ilaasortaqarniartup Tuluit Nunaat Europami sinniisuutitaqartilissammagu. Qinersinermili ajorsavissoq tassaavoq Labour - Gordon Brownilu. Taasisut 15,3 procentii naammanngilluinnarput 20 procentinut EU-mut qinersisoqanngikkallarmalli ministeriunerup nuannarineqanngeqisup uppitinnissaani inunnik aalassatsitsiqarnissaani killigitassatut oqaatigineqartutulli. Aviisit tusaqqusaartartut amerlanerit Brown anisereerpaat ilaatigut qulequtaralugu "Brownimut ulloq eqqartuunneqarfik". Kisiannili Labourip torsuusaani kikkut siuttunngussanersut isussuuttoqarnerani, illuatungiliuttut ullumikkut Brownip peersinneqarnissaa pillugu piumasaqaateqarnermikkut nipitusaarnerupput. Konservativit qinersinermi siuartitaata Daniel Hannanip meeqqanut taallaq atorpaa, tassa maannakkorpiaq Brown tunuartariaqartoq, Hannanilli tamanna qanoq pissanersoq soqutiginngivillugu, taamaattoqaruni naammattoq oqaatigalugu.
Brown tunuarit. Pisuinnarsinnaavutit, nersussuarmi qimussersinnaavutit, soqutiginngilara - taamaallaat maannakkut tunuaruit, konservativiusoq Daniel Hannan ippassaq taama oqarpoq. Unnugu premierminister Gordon Brown Labourimi partiit siuttuinik ataatsimeeqateqassaaq. Ataatsimiinnermi tassani tunniutiinnassanersoq unnugu tusarfigeqqikkumaarparput.
