Tuluit ministeriunerat aningaasanik taarsiisussanngorpoq
Eqqiaanermut, naatsiivilerinermut angerlarsimaffimmilu pequsersuinermut aningaasat atorneqarsimasut, 12.000 pundit, tassa 95.000 koruunit missaat, Tuluit Nunaanni ministeriunerup, Gordon Brownip, taarserniarlugit neriorsuivoq.
oktobarip 13-at 2009 06:21
Tamanna pivoq, misissuisitat ataatsimiititaliaannit paasineqarmat, aningaasanit akuersissutigineqartunit amerlanernik, Gordon Brown ukiuni kingullerni tallimani atuisimasoq.
Tuluit Nunaanni Underhusimi ilaasortat illuminnut inissiaminnullu aningaasat atugassatik marloriaammik sinnersimagaat, akileraartartullu akiliutaannik aamma atornerluerujussuarsimasut,Tuluit Nunaanni tusagassiuutinit siorna paasineqarpoq.
Inatsisartunut ilaasortat arlalippassuit partiinit annerneersut atornerluisunut aamma akuusimapput.
Politikerit allat aamma utertitsillutik akileeqqusaanissaat aamma ilimagineqarpoq.
