Tuluit kilitsissiaat toqunneqarpoq
Irlandimi kunngiitsuuniat partiianni Sinn Fein-imi peqqarniisaarnianut IRA-nut attuumassuteqartutut isigineqartartumi ilaasortaq Dennis Donaldson aallaaneqarluni toqunneqarsimavoq.
Irlandip ilaani Donegal-imi ukiuni 20-ni najugaqarsimavoq, tuluillu kilitsissiarigaat paasineqarpoq.
2002-mi oktoberimi paasisaanissami tungaanut partiip Sinn Feinip allaffeqarfiani pisortaasimavoq. Paasineqarmat kilitsissiaasoq partiimit siorna decemberimi ilaasortaajunnaarsitaavoq.
Tusagassiortunut siusinnerusukkut nassuerutigaa 1980-ikkunnili tulunnut kilitsissiaasimalluni, tamannalu peqqissimissutigisimaqalugu oqarpoq.
Sinn Feinip siuttuata Gerry Adams-ip uppernarsarpaa Donaldson tungiminnit sioorasaarneqarsimanngitsoq, tamallu eqqissisimanissaat pissutigalugu kilitsissiaasimaneranik pasillernerit nipangiunneqarsimasut.