Tuluit Kalaallit Nunaat ilisimanngilaat
Tuluit Kalaallit Nunaat pillugu ilisimasaqarpianngillat. Nunatsinni takornariaqarnermi inuussutissarsiornermilu siunnersuisoqatigiit, naatsunngorlugu GTE-mik taaneqartartut, misissuereerlutik taama inerniliipput.
Takornariat Kalaallit Nunaat pillugu qanoq ilisimasaqartiginersut aatsaat paasiniarneqaqqammerpoq, tuluillu nunarput pillugu ilisimasaqarpianngitsut paasinarsivoq.
- Takornariat Kalaallit Nunaat pillugu ilisimasaqarpianngimmata uggornaqaaq, nunattali Tuluit Nunaanni iluamik nittarsaanneqarnissaa sulissutigineqarpoq. Branding Greenland aamma Air Greenland suleqatigalugit tamanna pivoq, GTE-mi tuniniaanermi pisortaq Niels Feerup radioaviisimut oqarpoq.
Kalaallit Nunaat allamiunit ilisimaneqarpiannginnera inunnit tupigineqarsinnaasoq Niels Feerupip aamma oqaatigaa.
Nittarsaassinissarli sulissutigineqarpoq:
- Kalaallit Nunaat ilisimaneqarpianngilaq, nittarsaanneqarnissaali sulissutiginiarparput. Taamaammat USA-mi, Tuluit Nunaanni Tysklandimilu nittarsaaniarluta aalajangersimavugut, Niels Feerup oqarpoq.
- Kalaallit Nunaat pillugu Tuluit Nunaanni nittarsaaneq pissanganarlunilu pikkunarpoq, silalli allanngoriartornera pillugu oqallittoqaleruttorpoq, Kalaallillu Nunaat sammineqartorujussuulluni, taamaammat ilisimaneqaleraluttuinnarpugut, GTE-meersoq oqarpoq.
Takornariat asimi angalaartartut nunatsinnik ilisimannilluartuupput, kujataaniikkajunnerusarlutillu. Tuluit Nunaanneersut Islandikkoorlutik nunatsinnukartarput.
Takornariat misissuiffigineqarnerat GTE sinnerlugu TNS Gallupimit ingerlanneqarpoq. Tuluit 1022-t 40-llu sinnerlugit ukioqartut apersorneqarsimallutik.