Tuluit kalaallisut ilinniarsinnaanngorput
Ilinniarnertuut ilinniarfiisa tusaamasaamaneqarnerpaartaanni oqaatsivut tusarneqarsinnaalissapput; tassaavorlu Tuluit Nunaanni ilisimatusarfimmi Cambridgemi. Sisimiuni Oqaatsinik Pikkorissarfimmi kalaallisut ilinniartitsisoq, kalaallisut ilinniartitseqqullugu aggersarneqarsimavoq.
Sisimiuni Oqaatsinik Pikkorissarfimmi danskit kalaallisut ilinnialerlaat taama nipeqarsinnaasarput. Sapaatip akunnerata tulliani kalaallit oqaasiinik ilinniartitsisoq Klaus Georg Hansen ilinniarnertuut tuluit 80-t kalaallisut oqqatik qanoq assallariallaqqitsigineraat misilissavaa. Pikkorissartitsineq Sisimiuni Oqaatsinik Pikkorissarfimmi aallarterlaat ilinniartinneqartarnerattut ingerlanneqassaaq.
Oqaatsinik Pikkorissarfiup qarasaasiat iluaqutsiullugit allakkatigut, nipitigullu ilinniartitsinerit annertuumik ingerlattarpai, Tuluit Nunaanni atorniarneqarportaaq.
”Sumiluunniit angalatilluni qarasaasiaat allakkasuaataat, nipitaallu atorlugit tikisani oqaatsit atorneqartut ilinniaatigineqarsinnaapput” – Sisimiuni Oqaatsinik Pikkorissarfimmi kalaallisut ilinniartitsisoq Klaus Georg Hansen, tulunnik kalaallisut ilinniartitsiartulersoq nassuiaavoq. Ilinniarnertuut ilinniarfiat Cambridge issittoq pillugu ilisimatusarnerni siuarsimanerpaanngorusuppoq; siusinnerusukkullu issittumi oqaatsit atorneqartut tassani ilinniartitsissutigineqarnikuunngillat.
Sisimiuni Oqaatsinik Pikkorissarfik ilinniarnertuullu ilinniarfiat Cambridge, tuluit oqaasii aallaavigalugit kalaallisut ilinniartitsinermi oqaluttuarisaanermut ilannguttussanngorput.
