Tuluit Islandimut piumasaqaataat sakkukillisut
Islandip, Tuluit Nunaata Hollandillu Icesave pillugu pisortatigoortuunngitsumik oqaloqatigiinneri aallartereersullu taama pisoqarpoq. Tuluit Nunaanni aviisimi Financial Timesimi taama allaaserinnittoqarpoq.
Aviisimi aamma allaaserineqarpoq, Islandip 30 milliardit koruunit aningaasaliisunut aningaaseriviup sullitaannut, Tuluit Nunaata aamma Hollandip Island sinnerlugu qularnaveeqqutitut akilernikuusaannut, Island akiliisariaqartoq, Tuluit aningaasaqarnermut ministeriata aalajangiusimagaa.
Tusarfiit Islandimi naalakkersuisunut qanittut oqaatigaat, Islandimi naalakkersuisut Tuluit aviisiini paasissutissiissutigineqartunut oqaaseqarusunngitsut. Taamatut mianersortoqarneranut pissutaavoq, siusinnerusukkut tusatsiakkat avammut saqqummiunneqartartut, isumaqatigiinniarnernut ilungersunartorsiortitsisarnerat.
Islandimiut isumaqatigiinniartuisa Londonimi oqaloqateqarnermikkut, isumaqatigiissummit Islandimi inatsisartut ukiortaap nalaani akuersissutigisaannit pitsaanerusumik angusaqarnissartik anguniarpaat.
Islandimi naalakkersuisut akuersaarpaat, aningaasat atukkat Tulunnut Hollandimiunullu Icesavemit sullinneqarnermikkut annaasaqartunut atorneqassasut. Isumaqatigiinngissutaasorli tassaavoq, qanoq piumasaqaatitaqassanersut, piumasaqaatillu allangortinneqarsinnaassasut Tuluit aningaasaqarnermut ministeriata oqaatigaa.
