Tuluit inatsisartuini puffassimaartoqarpoq
Tuluit ministeriunerat, Gordon Brown, inatsisartunit puffassimaqisunit ullumi apeqqarissaarfigineqarpoq. Tamatumunnga pissutaavoq aningaaserivinniit paasissutissat isertuussassat, Tuluit Nunaanni innuttaasut affangajaannut tunngasut allakkerisarfimmiit tammaaneqalersimammata.
Paasissutissat, inunnut 25 millionit missaaniittunut, tassa ilaqutariinnut 16-it inorlugit ukiulinnik meeralinnut tamanut, ilaatigut ministeriunerup ilaqutaanut, tunngasut tammaaneqarsimapput.
Tassalu nunarsuatsinni paasissutissanik inunnut tunngassuteqartunik naalakkersuisunit tammaasat amerlanersaat.
Brown utoqqatseriarluni misissuisoqapallannissaa nalunaarutigaa.
- Pisup inunnut millionilinnut ajornartorsiutaallunilu isumakulunnermik kinguneqarnera ajuusaarutigeqaara utoqqatserlungalu, Gordon Brown inatsisartunut oqarpoq.
CD-rom-it tammaaneqartut inuit millionilikkaat atiinik, najugaannik, qanga inuunnngornerinik, aningaaserivimmilu kontoisa normuinik imaqarput. CD-rom-illu ammassagaanni oqaatsit isertukkat marluk atorneqartariaqartut tammaaneqarput, sulisut ilaata oktobarip 18-ianni nassiussami tammarnaveeqqusernissaat puigorsimammagu.
Gordon Brownip naqissuserpaa, manna tikillugu tammaaneqartut pinerlunnianit tiguneqarsimanissaat takussutissaqanngitsoq, politiillu suli tammaasat ujaarigaat.