Tuluit Helmandimi ajugaanissartik qularutiginngilaat

Tuluit sakkutuui arfineq pingasut toqutaasut ippassaq nalunaarutigineqarput - tassa tuluit sakkutuui 2001-imili Afghanistanimut isaammatali ullormut aatsaat taama amerlatigisunik toqutaasoqarluni. Taamaalilluni Afghanistanimi tuluit sakkutuui toqutaasut 184-inngorput.

Tuluit nunanut allanut ministeriata David Milibandip tusagassiortunik katersortitsinermi ullumikkut oqaatigaa, toqutaasut ilaqutaannut, tuluit sakkutuuinut nunamullu tamarmut "ullut ilungersunarsimaqisut".

Tuluit sakkutuuisa qullersaata Royal Air Forcemi generalip Jock Stirrupip oqaatigaa, Talibanit pikitsitsiniat, nunap immikkoortuani kujasissumi Helmandimi tuluit Natollu sakkutuuinut akersuunnerminni ajorsartinneqangajalersut.

- Suliassaq imaannaanngitsuuvoq, tassami Talibanit Helmand imminerminnut pingaaruteqarnerpaatut isigisarmassuk, sakkutuut naalagaat tv-kkut apersorneqartilluni ippassaq taama oqarpoq.

- Talibanit tamaaniittut ajorsartinneqarunik taava nunap sinnerani sumiluunniit ajorsartinneqassapput, sakkutillu tamaasa tassani atussavaat. Kisianni ajorsartinneqarnissaat sakutuutta qularutiginngilaat, sakkutuut naalgaat oqarpoq.

- Tamanna piffissamik atuiffiussaaq sakkutuunillu annaasaqarnissarput qularnanngilaq, sakkutuut naalagaat naggasiivoq.