Tuluit Nunaanni inuit coronavirusimut akiuussutissamik decemberip qaammaataani tunineqartalissapput.

Tamanna neriuutigineqarpoq. Tuluit peqqissutsimut ministeriat Matt Hancock BBC-mut ataasinngornermi taama oqartoq, nutaarsiassaqartitsivik Reuters allappoq.

- Qaammatip tulliani coronavirusimut akiuussutissiisalerumaarluta neriuutigaarput, taanna oqarpoq.

Akiuussutissaq sorleq atulissanersoq, Hancockip saqqummiussinermini erseqqissanngilaa.

AAMMA ATUARUK AstraZenecap coronavirusimut akiuussusiornini iluatsinnersoq ukioq naatinnagu paasissagaa

Coronavirusimut akiuussutissamik kapineqarsimasut coronavirusimik tunillanneqarsimanngitsut nakorsaataasuusamik kapineqartunit 70 procentinik amerlanerusut, nakorsaasiorfiup AstraZenecap akiuussutissamik misileraanerani ersereersorlu taama nalunaarpoq.

- Coronavirusimut akiuussusiinermut periusissiap annerpaartaa januaarimi, februaarimi marsimilu atuutilissaaq. Pissutsillu poorskip kingorna ilorraap tungaanukalerumaartut neriuutigaarput, Matt Hancock oqarpoq.

AAMMA ATUARUK Boris Johnsonip covid-19-imut akiuussutissamik juullertinnagu pilersuisoqarsinnaalissangatikkaa

Nakorsaasiorfiup AstraZenecap ilisimatusarfik Oxford Universitet akiuussutissamik misileraanermi suleqatigaa.

Akiuussutissaq taanna pitsassuusoq inuppassuarnillu annaassisinnaasoq, Oxford Universitymi misileraanermi aqutsisoq professor Andrew Pollard oqarpoq.