Tuluit coronamut akiuussutissaasinnaasut 90 millionit qulakkeeraat

Tuluit Nunaata naalakkersuisuisa isumaqatigiissutit Tuluit Nunaata covid-19-imut akiuussutissaasinnaasunik 90 millioninik pissarsinissaanik qulakkeerinnittut ataasinngormat atsiorpaat.

Tuluit Nunaata inuussutissarsiornermut ministereqarfia nutaarsiassaqartitsivik Ritzau naapertorlugu taama nalunaaruteqarpoq.

Tuluit Nunaat marlunnik isumaqatigiissuteqarpoq. Ataaseq ingerlatseqatigiiffinnik ataatsimoorlutik covid-19-imut akiuussutissaliornissamik sulissuteqartunik Pfizerimik BioNTechimillu isumaqatigiissutaavoq. Tuluit Nunaat taakkunanngaanniit akiuussutissaasinnaasumik 30 millioninik qulakkeerinnippoq.

Aamma Frankrigiminngaanneersumik Valneramik isumaqatigiissuteqarpoq. Ingerlatseqatigiiffik akiuussutissaliorniarnini iluatsissappagu, Tuluit Nunaat akiuussutissanik 60 millioninik taakkunanngaanniit pissarsissaaq.

AAMMA ATUARUK Boris Johnson: Coronap ajornartoortitsinera uagutsinnut kingunipiloqaqaaq

Covid-19-imut maannakkut akiuussutissaqanngilaq. Tuluit Nunaalli akiuussutissaasinnaasunik assigiinngitsunik pingasunik, katillugit 230 millioniusunik, qulakkeerinnereerpoq.

- Ingerlatseqatigiiffinnik nakorsaatinik akiuussutissanillu suliaqartuni nunarsuarmi siuttunik suleqateqalerneq Tuluit Nunaanni inuit navianartorsiornerpaat illersorniarlugit akiuussutissamik kapitissinnaanissaannut periarfissanik pitsaanerpaanik qulakkeerinnippoq, inuussutissarsiornermut ministeri Alok Sharma oqarpoq.