Qinersinerup inernera Tuluit Nunaata ministeriunermit konservativeusumit, Boris Johnsonimit siulersorneqarluni EU-mit aninissaanut aqqutissiuussisinnaavoq.Assi: Ben Stansall/AFP/Ritzau Scanpix

Tuluit brexit pillugu qinersiseqqittut

Tuluit EU-mit aninissamit taasinerannit ukiut pingasut qaangiuttut tuluit inatsisartunut brexitip siunissaanut aalajangiisussamik sisamanngornermi qinersisussanngorput.

Qinersinerup inernera Tuluit Nunaata ministeriunermit konservativeusumit, Boris Johnsonimit siulersorneqarluni EU-mit aninissaanut aqqutissiuussisinnaavoq.

Innuttaasunulli EU-mit aninissamut aalajangiinissamut nutaamik taasititsinermik aamma inerneqarsinnaalluni.

Nutaarsiassaqartitsivik, Reuters taama allaaserisaqarpoq.

AAMMA ATUARUK Jeremy Corbyn: Johnsonip brexitimut pilersaarutaa peqquserluttuliortoq nalunaarusiamit takutinneqarpoq

Tuluit Nunaata EU-mit oktobarip 31-aatinnagu aniseriarnera iluatsinngimmat Tuluit Nunaannut sunniuteqartumik politikkikkut uninngaannartoqalernera qaangerniarlugu Boris Johnson inatsisartunut decembarip ulluisa 12-ianni qinersisoqartussanngortitsivoq.

Taanna sapaatini akunnerni kingullerni ”brexit naammasitigu” oqaaseralugu qineqqusaarpoq. Taassuma Tuluit Nunaata EU-mit aninissaa kiisalu peqqinnissaqarfimmut, ilinniartitaanermut politiinullu aningaasanik atuinerulernissaq qineqqusaarnermini neriorsuutaasa ilagaat.

AAMMA ATUARUK Tuluit aviisii: Inatsisartunut qinersinissaq oqaluttuarisaanermi aalajangiisuussaaq

Boris Johnsonip partiip Labourip siulittaasua, 70-inik ukiulik, Jeremy Corbyn unammillertiginerpaavaa. Taassuma pisortani atuinerusoqarnerulernissaa, pissaarnerusut akileraarnerulernissaat brexitilu pillugu innuttaasunut nutaamik taasititsinissaq neriorsuutigai.

Isummanik paasiniaanerit annertuut tamarmik konservativit amerlanerussuteqarnissaannut ersersitsipput.

Taamaakkaluartorli Boris Johnsonip kissaatigisani tassa amerlanerussuteqarlualernissaa qulakkeeqqanngilaq.

Isummanik paasiniaanerit naapertorlugit naligiingajattoqarneranik inissittoqarsinnaavoq – taamaattoqassappallu brexitip sivisuumik naammassiniarnera suli sivisusinnaassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat