Tuluit aviisianni "The Economist"-imi Aqqaluk Lynge nersualaarneqartoq

Nunap inuiisa sinniisui siulersuisut ataatsimiittarfiini, præsidentit illorsuini aallartitallu ataatsimeersuarnerini peqataasinnaanerat pillugit, tuluit aningaasaqarneq pillugu aviisianni, The Economist-imi, allaaserineqarpoq.
Allattoq Jaaku Lyberth
juunip 08-at 2008 17:18

Allaaserisami Inuit Issittormiut Siunnersuisoqatigiiffiata Kalaallit Nunaanni immikkoortortaqarfiani siulittaasoq Aqqaluk Lynge assersuutitut atorneqarpoq.

Aqqaluk Lynge tallliortoq politikererlu, naalagaaffiit issittumi nunaqartut tallimat Ilulissani ataatsimeersuarneranni pikkunaatsoortinneqarpoq, minutsillu qulit kisiisa atorlugit oqalugiarsinnaatitaanini naammaginagu.

Nunat allat pissaanillit iluarisatik atorlugit iliorfigissanngilaatigut, 1600-kunni arfernik piniapilunnermikkut arfernik ikilisaasut, 1700-ikkunnilu upperisatsinnik allanngortitsisut aammalu nunap assingisa titartarneqarnerinik allanngortiterisut, killeqarfinnillu allanngortitsisut, pinngitsaalillutalu najugaqarfigisatsinnit nuutsilluta, aviisip The Economist-p Aqqaluk Lynge taamatut issuarpaat.

Kalaallit puisinniarsinnaatitaanerat illersoraangamiuk Aqqaluk Lynge aallussilluartarpoq, The Economist allaaserisamini ippassaq saqummersumi ilaatigut taamatut allappoq.