Tuluit amerikamiullu Libyamik saassussipput

Amerikamiut sorsuutaat umiarsuit aamma Tuluit aqqartartuat Libyap avataaniit qaartartunik igeriuttakkanik 100-t sinnilinnik, Libyami kisermaassilluni naalakkersuisup, oberst Muammar Gaddafip illersortaasa inissisimaffiinut, maannamut 20-usunut, igeriussuipput, Amerikami illersornissamut qullersaqarfik Pentagon taama nalunaarpoq.

Qaartartut eqqorusutamut allaat kilometerit 1000-t angullugit ungasissusilimmut uniuinani igeriunneqarsinnaasut Tomahawk-inik taaneqartartut, Libyami illoqarfiit pingaarnersaannut Tropoli-mut aamma illoqarfimmut Misrata-mut umiarsuarmit - kangimut 175 kilometerinik ungasinnerusumiittunut igeriunneqarsimapput.

TV-kkut nutaarsiassaqartitsivik CNN nalunaarpoq sorsuut tassaasoq USS Mount Whitney.

Nunat tamalaat siuttuisa Frankrigimi ataatsimiinnerisa naammassineraninngaanniit nalunaaquttap akunnialunngui qaangiutiinnartut qaartartumeerinerit aallartipput.

Gaddafip saassunneqarnissaanik aalajangernissaq, nunat siuttuisa Libyap silaannartaata timmisartorfigeqqusaannginneranik aalajangiisimasut, ataatsimiinnerminni eqqartugaasa pingaarnersaraat.

Qaartartunik ungasianiit igeriuttakkanik saassussinngitsiarnermi Frankrigip sakkutuuisa timmisartortartut, Libyami oqartussat sakkutuuisa qamussui sisamat saassuppaat.

Qamussuit suujunnaarsinneqartut, franskit illersornissamut ministereqarfiata nalunaarutigaa.

Libyami pisut kingulliit pillugit nutaarsiassaqartitsivimmit AFP-mit unnummut nalunaarutigineqartut ilagaat, franskit timmisartuat malersuut Gaddafip sakkutuuinit nakkartinneqarsimasoq.