Tulliani parteertik unammillertissinnaaneraa apeqqutinngorpoq

USA-mi Republikanerit partiiat sunniuteqarsinnaanani ingerlarsortussanngorpoq. Naalakersuisussasmmi akornanni sunniuteqarsinnaajunaarput, taassumalu saniatigut Inatsisartuni, USA-mi tamanit sinniisuutitaqarfiusuni aamma malunnartumik ikinnerussuteqalerput. Maannakkumiit partiip anguniagassai immikkuullarissut saqqummiunniartussaagaluarpaat, suulli sammigunikkit malunaateqarnerunissaat takujuminaappoq. Taassuma saniatigut inunnik tatigisinnaasaminnik marlunnik pingasunilluuniit siuttuusinnaasunik toqqaaniartussaapput. Kiisalu piaartumik aalajangertariaqalissavaat, Naalakkersuisunngortussat Demokratit, Inatsisartullu amerlanersaat aamma Demokratiusut suleqatiseriinnassanerlugit, illuatungiliuttutummi sunniuteqarsinnaanerat killeqartupilussuanngortussaavoq.

Taamaakkaluartoq 2012-mi Sarah Palinip qineqqusaarnissaanut suliniuteqartut aallartereerput, taakkuali amerlanersaat Republikanerit partiiata iluani talerperliupput upperluarniartut. Republikanerit sinnerisa, soorlu niivertut, ingasaassinianngitsut nunanullu allanut torersumik atassuteqarnissamik pingaartitsisut akornanni, Sarah Palin puigupallaniarneqaannarpoq, ilaatigut McCainip ajorsarneranut pisuutinneqarluni. Palinimut akerliusut nunanut allanut tunngasunik ilisimasakippallaartoq, ilaatigut Palin isumaqarsimanerarlugu Afrika naalagaaffiusoq nunavissuunani naalagaaffeqarfippassualik.