Tullersortaajuartoq kiisami ajugaavoq

Aalborgimi kalaallit erinarsoqatigiit Ikinngutigiit ajugaasuupput erinarsoqatigiit unammineranni. Taakku erinarsorpat 'Isummamik tunilagit' Laura Street Therkildsenimit taalliarineqartoq erinniortuuvorlu erinarsoqatigiit aqutsisuat Jens Fonsbøl. Erinarsoqatigiit taakku aamma tullersortaajuartutut taaneqartarput.

Ukiummi kingulliit arlariit tullertut inissittarsimapput ajugaassanatik. Taamaammat erinarsuummut ajugaassutaasumut taalliortoq nuannaaqisoq KNR-ip naapippaa.

- Ajugaalluni nuanneqaaq. Erinarsorsimanermut aajuna iggiarluppunga, Laura Street Therkildsen oqarpoq.

Ataasiakkaarluni unamminermi Per Oluf aamma Ane Marie Rasmussen Aalborgimi kalaallit peqatigiiffiata aappaaniit Ikerasammeersut ajugaapput. Ikastimi kalaallit peqatigiiffiat Nanoq tullersortaavoq. Tassalu 33-ssaa Tusa ingerlanneqarpoq.

Kalaallit peqatigiiffiisa erinarsoqatigiivi arfinillit imminnut ukioq manna unammipput. Tusarnaariartartulli ikilisimammata, aningaasassaalersimanerlu pissutaalluni erinarsorluni unammiuaartarneq inersuaaqqamut minnerulaamut Vejle-mi DGI-Hus-imiittumut ukioq manna nuunneqarpoq. Inersuup 1.200-nik inoqarsinnaasup attartornera akisuallaalersimasoq Inuit siulitaasuata tullia Niels Peter Nielsen nassuiaavoq.

- Aningaasartuutit 120.000 koruuniusaraluartut maanna 80.000-iinnannortissimavagut.
Inersuarmik attartorfigisattakkattami qujanartumik nuannaarluta aggertarnerput pissutaalluni qujagaluta akikilliliivigigamisigut, tassa naliginnarmik 60.000-t missaani akiliisaraluarluta maanna 15.000-inut attartornermut akia apparamikku, oqarpoq.

Danmarkimi kalaallit peqatigiiffiisa kattuffiat Inuit Namminersorlutik Oqartussanit aamma Den Kongelige Grønlands Fond-imit ukiormanna tapiiffigineqarpoq.