Tulaassuisinnaatitaanerup atorunnaarsinneqarnissaa iluaqutaassaaq
Ullumikkut uuliamut assartuinermullu akit qaffakkiartuinnarneranni sinerissami kilisaatersortartut pisamik 25 procentiinik tulaassuisinnaatitaanertik ukiut arfinillit qaangiuppata taamaatissinnaassappatigit aalisarnermik aningaasarsiornikkut oqimaatsorsiornerannut iluaqutaassaqisoq Frans Heilmann, Sigguk A/S-imi pisortaq oqarpoq.
Taamaakkaluartoq sinerissami aalisakkanik tunisassiorfiit atorunnaarneqarnavianngitsut isumaqarpoq.
- Tunisassiorfeqarneq taanna naatsorsuutigivara piviuartariaqassasoq pissutigalugu ilaatigut aalisarneq akilersinnaanerummat nunamut tunisissagaanni uku kilisaatit aamma akitsoraluttuinnavikkamik tunisassiorfillit taamaattumik suli akikinneruvoq nunami tunisassiorfeqaraanni, Frans Heilmann oqarpoq.
Sigguk A/S Polar Seafood-ikkunnik piginneqataaffiuvoq, massakkullu taakkua Aasianni tunisassiorfissamik nutaamik sanaleruttorput. Tamakkualu aningaasaliissutit annertuut imminnut matussuserneqassappata tunisassiorfiit nunamiittut imaaliallaannaq atorunnaarsinneqarnissaat qularnartoq Frans Heilmann oqarpoq.
Taamaakkaluartoq aalisarnerup imminut akilersinnaanerulernissaata aqqutissiorneqartarnissaa pingaaruteqarluinnartoq Frans Heilmannip aamma oqaatigaa. Ingammik aningaasanut inatsimmi aningaasanut amigaataasunut matussusiisussatut isigineqaannarnissaa qaangerusunnartoq Sigguk A/S-mi pisortaq oqarpoq.