Tukuma Arctica Kinamiit nunatsinnukartoq
Umiarsuaq containerilersuut Tukuma Arcticamik ateqartoq containerinik 2150-inik usisinnaavoq. Umiarsuarlu Royal Arctic Linep umiarsuaataani annerpaalluni.
Tukuma Arcticap umiarsuaatileqatigiiffimmut tunniunneqannginnerani Hongkongip avataani Kinap kujataata imartaani 2019-imi decembarip qaammataani misilerarneqarpoq.
Royal Arctic Linep taamaalilluni Islandimiut umiarsuaatileqatigiiffiannik Eimskipimik suleqateqarnini aallartissinnaanngorpaa, Royal Arctic Linellu umiarsuaa aappaluttoq, Tukuma Arctica, Nuummut sapaatit akunneri pingasukkuutaarlugit tikittassamaarpoq.
Tukuma Arcticap Nuummut siullerpaamik apriilip ulluisa 17-iani tikinnissaa naatsorsuutigineqarpoq.
Royal Arctic Line taama nalunaaruteqarpoq.
Tukuma Arcticap angerlamut angalanissaa sivisussaaq, ilaatigut Suez-kanaalikkuussaaq, Akullersuakkoorluni Tuluillu Nunaata Frankrigillu akornanni ikerasakkuussaaq marsillu ingerlanerani Aalborgimut apuutissalluni, tamatumalu kingornalu Aarhusiliassaaq. Piareersagassallu kingulliit inuttanit isumagineqareerpata nunatsinnut apriilip qulingani aallassamaarluni.
