Tuborgip pilerisaarinermik suliniutaa Meeqqat illersuisuanit isornartorsiorneqartoq

Meeqqat Illersuisuat Aviâja Egede Lynge taama isumaqarpoq. Taassuma tunisassiortup immiaaqqamik Grøn Tuborgimik Facebookimi quppernermini pilerisaaruteqarnera maluginiarsimavaa.

Tuborgip quppernermini tassani immiaaqqamut nuannarineqarluartumut taaguutissanik unammisitsinermi inernerit saqqummiuppai. Taaguutissatullu ajugaatinneqartut tallimat puiaasaaqqanut allagartaliunneqassapput pisiniarfinnilu tunisaalertussaassallutik.

Ileqqorlunneruvoq meeqqanullu oqariartuutaallu peqqinnanngitsoq

Taaguutissatullu ajugaatinneqartut tallimaasut ilagaat "Asasaarannguara".

- Imigassap inuttut asanniffigisatut oqariartuutitut atornera ileqqorlunneruvoq peqqinnaranilu, Aviâja Egede Lynge taama isumaqarpoq.

Taaguutissatut ajugaatinneqartut ilai ajoriffissaqartinngilai, soorlu ”Nillertunnguaq” aamma "Mamassaaq”.

Meerarpassuarnut asissuinerusoq

- Immiaraarli "asasaarannguara"-mik taagussallugu inuunermullu toqqissisimanartumut isumannaatsumullu naleqartitanik tunissallugu meerarpassuarnut ilaqutariinni imigassamik ajornartorsiuteqarfiusuni peroriartorsimasunut asissuineruvoq, Meeqqat Illersuisuat oqarpoq.

Imigassallu torrattuuneranik meeqqanut inuusuttunullu isumaqalersitsisinnaasunik oqariartuutilinnik allagartalersuisarneq mianersoqqussutigaa.

- Meeqqat inuusuttullu oqariartuutinik takusaminnik tusaasaminnillu sunnertiasuupput - aamma imigassamut tunngasunut tunngatillugu,
 Aviâja Egede Lynge taama naggasiivoq.