Tuberkulosemik suliniarneq nersualaarpaa

Taamaaliorneq ajunngitsumik ingerlanerusoq, Bolette Søborg isumaqarpoq. Taassuma Kalaallit Nunaanni sakialluummik nappaateqarneq ph.d-liarisani tallimanngormat misilitsissutigaa.

- Aqqutaavoq taanna malitassaq, sakialluummik nappaat pillugu paasissutissat inuit suusut nalussanngilaat, Bolette Søborg, Qallunaat Nunaanni naalagaaffiup akiuussutissalerinermut instituttiani nakorsaq, oqarpoq.

- Qularnanngilluinnarpoq ima suleriaaseqarneq pitsaanerpaajusoq, tassa taakku sakialluummik nappaateqartut tunillaassuisut nassaarineqapallanneqarnissaat.

Bolette Søborgip Kalaallit Nunaanni misissuisimanera Ilisimatuussutsikkut Kalaallit Nunaanni misissuinerit kommissionianit aningaasalersorneqarpoq.

Bolette Søborgip Kalaallit Nunaanni sakialluut pillugu misissuisimanini tallimanngormat misilitsissutigaa. Kalaallit Nunaat tamakkerlugu misissuinera meeqqanik 2200-nik peqataaffigineqarpoq.

Sakialluutip nappaataanera anigorniarlugu umiarsuarmik misissuilluni angalasoqarnera ima Bolette Søborgip isumaqarfigaa:

- Isumaqarpunga Kalaallit Nunaanni sakialluut pillugu suliniuteqarluartoqartoq. Nalunaarsorneqarsimasut pillugit misissuigatta, takusinnaavagut sakialluummik nappaateqartut nassaarineqartartut, taakkulu katsorsarneqarnerat aamma ingerlalluartartoq nalunaarusiani takusinnaavagut. Nunat tamalaat malittarisassaat malillugu iluatsittumik suleriaaseqartoqarpoq. Maannakkulli sakialluummik nappaatillit tunillaassuisut nassaarineqartariaqarput.

Arlaatigulli sakialluummik nappaateqarneq iliuuseqarfigineqartariaqartoq Bolette Søborg isumaqarpoq.

1950-60-70-ikkunni sakialluummik nappaateqarneq iluatsittumik iliuuseqarfigineqaraluartoq, 90-ikkunni sakialluummik nappaateqartoqaqqilernera nalinginnaasuunngilaq.

- Inuit sakialluummik nappaateqarnerat amerleqqinnerat nunani assigiinngitsuni takuneqarnikuunngilaq. Ajoraluartumik Kalaallit Nunaat nunani sakialluummik nappaateqarfiusuni qaffasissumik inissisimavoq.

Bolette Søborgip Kalaallit Nunaanni misissuisimanera Ilisimatuussutsikkut Kalaallit Nunaanni misissuinerit kommisionianit aningaasalersorneqarpoq.