Tuberkolose Tunumi amerlanerit timaanniilersimavoq

Sakialluut tuberkolose Tunumi amerlanerusut timaanniilersimavoq.

Danmarkimi Nuummilu Dronning Ingridip Napparsimmavissuani ilisimatuut ukiaq kingulleq Tasiilami nunaqarfianilu Kuummiuni atuartut misissuiffigaat. Taamani misissuinerup inerneri Nunat tamat issittumi peqqinnissakkut atukkat pillugit ataatsimeersuarneranni saqqummiunneqassapput.

Ataatsimeersuarneq Ruslandimi Novonibirskimi ingerlanneqartoq ullumi aallartippoq.

Tasiilami meeqqat atuartut syv procentii sakialluummik tunillanneqarsimapput, nunani 22-ini tuberkoloseqarfiunerpaani kisitsisinit saqqummersartunit annerulluni.

Tasiilami meeqqat sakialluummik nappaateqalersimasut marluk siumorpaat, taakkulu erngerlutik nakorsarneqalerput.

Kuummiuni sakialluummik tunillatsittoqarsimanngilaq.

Tunumi misissuinermi meeqqat atuartut arfinilinniit 18-inut ukiullit 445-t peqataapput.

Ilisimatuut Tunumiinnerminni tuberkuloseqarnermik misissueriaaseq nutaaq, misissugassamik aaviineq atulerpaat, inernerilu isumalluarfigineqarput.

Timip tuberkoloseqarnera amikkut siornatigut misissorneqartaraluarpoq.