Tuapannguit: Ikittuinnaat inissianik pisinissartik kissaatigaat
Tuapannguani najugaqarsimasut aqqaniliinnaat inissianik piginneqatigiiffimmi 1-imi aamma arfineq-pingasuinnaat inissianik piginneqatigiiffimmi 2-mi inissianik pisinissartik kissaatigaat. Tuapannguani najugaqalersussat sinneri Namminersornerullutik Oqartussat inissianik attartortittagaanni najugaqartuupput.
Tuapannguani piginneqatigiilluni inissiaatileqatigiit, blokkini Q, R aamma S-imi najugaqarsimasunut taama allagaqarput.
Peqatigitillugu inissiaatileqatigiit maluginiaqquaat atuinermi akit malunnaatilimmik qaffannikuunerat inigisamut akiliummut sunniuteqassammat.
Assersuutigalugu inissianik piginneqatigiiffimmi 2-mi 1.salimi sisamanik initalimmi piginneqataaniaraanni, inigisamut qaammammut akiliut 7.369 koruuniussaaq, taamaattorli inissianik piginneqatigiiffimmut 7-imut 2011-mi aatsaat naammassisussami piginneqataaniaraanni qaammammut akiliut 10.973 koruuniussaaq.
Tuapannguani inissiat unnugu Qanoruumi annerusumik sammineqassapput.