Tuapannguani inissiat iluanaarutigineqartarnerat unitsinniarpaat

Nuummi Tuapannguani inissiat landskarsimit tapiiffigineqarlutik sanaartorneqartut, aningaasarpassuarnik iluanaarutigineqarlutik tuniniarneqartarnerat, naalakkersuisut akuersaarumanngilaat.
Allattoq Jaaku Lyberth
januaarip 22-at 2010 05:11

Inissianik pisisut inissianut pisiarisimasaminnut iserternatilluunniit tuniniartaraat, aviisi sermitsiaq ullumi saqqummersoq taamatut allaaserisaqarpoq.

Inissiat tuniniarneqartut kingulliit ilaat, 1,99 millioni koruunilerlugu tuniniarneqarpoq. Inissiaq taanna novemberip ulluisa 27-ani sanaartorlugu naammassineqarpoq, 1,77 millioni koruuninillu akeqarluni. Inissiaq akit taakkua malillugit inissiamik piginnittup tuniguniuk 220,000 koruuninik iluanaaruteqassaaq.

Pisortat tapiiffigisimasaannik inissianik iluanaaruteqartarneq unitsinneqassaaq Ineqarnermut Naalakkersuisoq Jens B. Frederiksen oqarpoq.

Inissianik pisisut iluanaaruteqartarnerisa unitsinneqarnissaannut suut pisariaqarnersut Ineqarnermut Naalakkersuisoqarfimmi misissorneqarpoq. Inatsisiliortoqassanersoq imaluunniit inissianik pisisussat Namminersorlutik Oqartussanik isumaqatigiissuteqartassanersut, Naalakkersuisoqarfimmi misissorneqarpoq, Ineqarnermut naalakkersuisoq Jens B Frederiksen oqarpoq.

Inissiat naalakkersuisunit tapiiffigineqartut tuniniarneqartarnerat naalakkersuisuinit akuersaarneqanngillat.

Inissiat Tuapannguani sanaartorneqartut, Namminersorlutik Oqartussanit tapiiffigineqartut tuniniaqqinneqarneranni, iluanaarutigineqartut annerpaartaat 487.000 koruuniupput.