Tuapannguani inissiat ilaat attartorneqarsinnaalerput

Innutaasut kikkulluunnit inissianik taakkuninnga, maannakkut sanaartorneqartunut qinnuteqarsinnaalerput, Ineqarnermut naalakkersuisoq Jens B. Frederiksen taamatut nalunaaruteqarpoq.

Innuttaasut ilaannit atsiortitsinikkut inissiat taakkua nalinginnaasumik attartortakkatut neqeroorutigineqarnissaat piumasarineqarpoq, tamannalu naalakkersuisunit tusaaniarneqarsimavoq.

Inissianut taakkununnga 30-nut attartortunngorniartunut arlalinnik piumasaqaatitaqarpoq.

Qinnuteqartut aalajangersimasumik initaarniarlutik allattorsimaffimmi utaqqisuussapput.

Attartortunngorniarluni qinnuteqartoq ukiuni kingullerni pingasuni Namminersorlutik Oqartussat inissiaataanni akiitsoqarsimassanngilaq.

Aamma qaammatini arfinilinni inigisamut akiliutip nalinganik naafferagassaanngitsumik qularnaveeqqusiissaq.

Ineqarnermut naalakkersuisup Jens B. Frederiksenip Tuapannguani inissiat 30-t attartorneqarsinnaannerannut kikkunnit tamanit qinnuteqarsinnaanermut nalunaarummini erseqqissarpaa, inissiaq piginneqatigiilluni inissiaatitut pisiarineqarsinnaassanngitsoq.

- Taamatut piumasaqaateqarnermut pissutaavoq attartortut Namminersorlutik Oqartussat inissiaataannik attartortunngornatik, piginneqatigiilluni inissiaatillit peqatigiiffianni attartortunngortussaammata Jens B. Frederiksen allappoq.