Tuapaat - nutaalianik eqqumiitsulianillu assigiinngitsunik pisiniarfik
Pisiniarfimmik ammaasussanut tamanut ilisarnaataavoq, tamarmik suliaminnik takutitsarfissaminnik tuniniaavissaminnillu pisariaqartitsimmata. Nutaaliorneq eqqumiitsuliornerlu saniatigullu pisiniarfimmik ingerlatsinissaq imaannaanngilaq.
Taamaammallu inuit arfineq marluk ataatsimoorfissaminnik pilersitsipput, isumassarsioqatigiittaarniarlutik, aningaasartuutinik avitseqatigiinnikkut ingerlatitsiniarlutik aammalu paarlakaajaallutik pisiniarfiup aammanerani pisiniartitsisarniarlutik.
Pisiniarfiup tuniniagassaai, assigiinngitsuupput, nammineq sanaat, soorlu pinnersaatit sølvemik sanaat, umimmaap qimmillu meqqui nuersagassiat, qilattakkat, nissikullattakkat, annoraaminernik, puisip amiinik aammalu aalisakkat amiinik mersukkat, naasut qalipaataanik misunnikunik nuersagassiat, assilissat, qalipakkat aammalu qissianik eqqumiitsuliat sanalukkallu.
Qaammatillu tulliit ingerlaneranni igalaaminernit atortussianik aamma tuniniaasalissapput, pisiniarfimmi ingerlatitseqataasut ilaat igalaaminernik sanaluttarfimmik ammaanerani. Inuit arfineq marluk pineqartut tamarmik assigiinngitsunik suliaqartarput.
Pisiniarfimmik aammaanissamik aallartitsisut ukuupput: Nauja Brøns, Nive Brøns aammalu Kunuk Brøns, taakkulu ilagaat Inge Olsvig Brandt, Dorit Olsen, Trine Nørbye Olesen aamma Nina Paninnguaq Skydsbjerg Jacobsen. Pisiniarfiullu ammaanersiornerani tamarmik najuutissapput, ataasinngorneq 15. juli, nal. 16.30, Tuapaat, Hans Egedep Aqq. 29.
