Tsvangirai qimaasariaqarsimavoq
Zimbabwemi sakkutuut, Mugabemik tapersersuisut Morgan Tsvangirai-p angerlarsimaffimminut aagaanni kalerrinneqarami Hollandimiut aallartitaqarfiannut qimaasariaqarsimavoq, taama Senegalip præsidentia, Abdullah Varde præsidentinngorniuttunik suleqatigiissitsinaraluareerluni nalunaarpoq. Kisianni Abdullah Vardep nalunerarpaa Tsvangirai Hollandip aallartitaqarfiani qanoq toqqissisimatigissanersoq, sakkutuummi aallartitaqarfimmut isaasinnaapput Tsvangirai-lu tigusaralugu.
Zimbabwemili politiit pisortaata sooq Tsvangirai qimaasimanersoq nalunerarpaa, sioorasaarisoqarsimaneranummi maalaarummik tusagaqarsimannginnamik.
Naatsorsuutigineqarpoq Tsvangirai-mik tapersersuisut 70-it missaaniittut maannamut toqunneqarsimassasut, ilaatigut Tsvangirai-p partiiani, MDC-mi siuttut ilaata nulia ikuallagussaavoq, assai isigaalu kipineqarsimallutik.
Nunat Afrikap kujataaniittut suleqatigiiffiata SADC-p Zimbabwemi naalakkersuinikkut pissanganartorsiorneq aqagu immikkut ittumik ataatsimiissutiginiaraa, nutaarsiassaqartitsivik APF unnummut nalunaarpoq. Zimbabwep præsidentiata Robert Mugabep tatineqarnerata annertusiartornera tamatumunnga patsisaasorineqarpoq.
Afrikami nunat siuttuisa arlallit Mugabe tallimanngorpat qinersinissamik pilersaarutiminik kinguartitseqqullugu kajumissaarpaat – taakkununnga ilaalluni naalagaaffimmi Afrika Kujallermi partip naalakkersuisuutitaqartup ANC-p siulittaasua Jacob Zuma.