USA-p soqutiginninnera taamak annertutigitillugu Danmark Kalaallit Nunaat illersorniarlugu sukataarnerusariaqartoq, Inuit Ataqatigiit folketingimut ilaasortaatitaat Anja Chemnitz Larsen isumaqarpoq Assi: Anne-Katrine B. Olsen

Aaja Chemnitz Larsen: Trumpip tikeraarniarunnaarnerani Danmark sukataarnerusariaqarpoq

Præsident Trumpip pissusilersornera akueriuminaatsuuvoq. Kalaallit Nunaalli nunarsuatsinnut qanoq naleqartigineranik takutitsisuuvoq, soqutiginninnerlu annertusiartortillugu Danmark Naalagaaffittut akisussaaffimmini sukataarnerusariaqartoq, folketingimut ilaasortaq Aaja Chemnitz Larsen isumaqarpoq.

- Pissusilersorneq taamaattoq akueriuminaalluinnarpoq, Inuit Ataqatigiit sinnerlugu folketingimut ilaasortaq Aaja Chemnitz Larsen Trumpip septemberimi Danmarkiliarnissani taamaatiinnarneranut taama qisuariarpoq.

Præsident Trumpilli Nunatsinnut soqutiginninnerata pinngitsoorani Danmarkimut eqeersaataasussaavoq, Aaja Chemnitz Larsen isumaqarpoq.

AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa

Danmark Kalaallit Nunaannut susassaqarfinnut 32-inut akisussaasuutillugu pisoq pingaartumik eqeersaataassasoraa.

- Kalaallit Nunaat soqutigineqaleriasaarpoq, aammami amerlavallaatigut misigisarparput Nunarput puigorneqartoq. Taamaammat pingaaruteqarpoq suleqatigut (Folketingimi aaqq.) eqqaaseqqissallugit nunatsinni aaqqitassat pingaarutillit suliassaammata. Soqutigineqarneratali annertusinera eqeersaatitut tiguneqarsinnaavoq, Aaja Chemnitz Larsen oqarpoq.

AAMMA ATUARUK Amerikamiut Issittumi sakkutuui amerlissapput

Inatsisinut atuutsitsinermut tunngasunut, isertitsivinnut, eqqartuussivinnilu atugassarititaasut Danmarkimut sanilliullugu pitsaannginnerujussui tikkuarpai - politeeqarneq eqqartuussiveqarnerlu Danmark Naalagaaffittut akisussaaffigalugu naligiinngitsumik atugassaqartitsimmat.

Illersornissaqarfimmi ukiorpassuarni tusiattoqartoq Aaja Chemnitz Larsen oqarpoq. Ministeriuneq Mette Frederiksen (S) Illersuinermullu Ministeri Trine Brahmsen (S) kunngeqarfiup iluani issittumi illersorniarneq nukittorsartarialik ataasinngormat oqaatigaat.

- Danmarkip nunatsinni akisussaaffippassuatik ataqqinerusariaqarpaat pitsaanerusumillu naammassisariaqarlugit, Aaja Chemnitz Larsen oqarpoq. 

Kalaallit Nunaat soqutigineqaleraluttuinnarnera atorluarlugu

Trumpip Danmarkimut tikeraarnissani kinguartillugu marlunngornermi unnukkut attaveqaqatigiittarfikkut Twitterimut allappoq.

Inuit Ataqatigiit folketingimut ilaasortaatitaat naapertorlugu taamaatitsiinnarnera Kalaallit Nunaata USA-llu akornanni pissutsinut kalluaavallaanngilaq. Kalaallit Nunaatali soqutigineqaleraluttuinnarnera nunatta Danmarkillu atorluartariaqarpaat.

AAMMA ATUARUK Uppernarsarneqartoq: Trump nunatta pisiarinissaa pillugu misissuivoq

- Periarfissaq maangaannartinnginnissaa pingaaruteqarpoq, siunissamilu nunat pingasut akornanni suleqatigiilluarneq ataavartumik ingerlanissaa sulissutigineqarnissaa.

- Kalaallit Nunaat USA-mut tunineqassanngitsoq suli isumaqarpunga, USA-lu suleqatigisassatut Kalaallit Nunaannut soqutiginartuuvoq. USA-mit pisiaritinngikkualuarluni periarfissanik ujartuisoqarsinnaavoq USA-lu qaninnerusumik suleqatigilernissaanut ammaassisinnaalluni.  Aaja Chemnitz Larsen KNR-imut oqarpoq.

AAMMA ATUARUK Mette Frederiksen: Kalaallit Nunaat tuniniagaanngilaq

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat