Ilulissani innuttaasut: Trumpip taamaatitsiinnarnera ajunngilluinnarpoq
Præsident Donald Trumpip Danmarkimut pisortatigoortumik tikeraarnissaraluani taamaatiinnarpaa. Trumpip taamaatitsinerminut nunatta USA-mit pisiarineqarnissaannut ministeriunerup Mette Frederiksenip itigartitsisimanera pissutaanerarlugu attaveqaqatigiittarfikkut Twitterikkut ilisimatitsissutigaa.
Statsministerip Mette Frederiksenip Naalakkersuisullu siulittaasuata Kim Kielsenip tamanna “oqallinnermik pisariaqanngitsoq”-mik oqaasertalerpaat. Taama naliliineq USA-p præsidentiata "ajuissuunnerarpaa".
Trumpip taamaatitsiinnarnera pillugu Ilulissani innuttaasut isumaannik paasiniaavugut:
Niels Grim:
- Tikeraarniarunnaarmat qujaannarpunga. Akisussaaffitsinnik arsaarsinnaannginnamitigut.
Bodil Davidsen:
- Tamanna ajunngilluinnarpoq. Kalaallit Nunaammi - uagullu tamatta maaniittugut - pisiarissanngilluinnarpaatigut. Uagummi namminiussuseqarpugut aamma maani eqqissilluta najugaqarnissatsinnut periarfissaqassaagut. Kangerlussuarmut mittarusukkunik mittarniarlik. Assersuutitut. Kisianni aamma aserfallatsaaleqataaffigissavaat. Taamaattorli pigilissanngilaatigut.
Ludvig Fleischer:
- Tassa isummeriarpunga soorunami pissaanerminik tigumminnittoq atornerlulaarlugu - atornerlullugu - taamatut. Nammineq isummani kisiat atorusukkaa.
Erik Bjerregaard:
- Oqarsinnaavunga allat assigalugit ileqimisaartuinnarsimallunga. Qungujuutigiinnarlugulu. Tassami Trumpi pillugu tusartakkavut atuartakkavullu uppernarsarneqaannarput. Tassa suut tamarmik pisiarineqarsinnaasorineqartut. Inuppassuimmi ilaat taama isumaqarput. Ingasammik nunat aningaasarissaartut,
Erik Bjerregaard Ilulisaniittumi Hotel Arcticimi pisortaanikuuvoq. Præsidentillu nunatsinnik pisiariumannikkusuummersimaaraluarnera nunarsuarmioqatitsinnut akeqanngitsumik ussassaarutaalluartoq, ukiorpassuarni takornarianik suliaqarsimasoq oqarpoq:
- Isumaqarpunga nunarsuup ilaani sumiiffinni takorloorsimanngisatsinni, aamma Kalaallit Nunaat pillugu tusagaqarfiusimanngitsuni, Kalaallit Nunaat nittarsaanneqarluartoq. Tassami Kalaallit Nunaannit assilisat kusanarluinnartut takoriasaarpaat, tamannalu takornariaqarnermik siuarsaaneq eqqarsaatigalugu nittarsaassineruvoq aningaasanngorlugu immaqa milliardit pallillugit naleqarsinnaasoq.
Præsident Donald Trumpip København pisortatigoortumik septemberip aappaani pingajuanilu tikeraartussaagaluarpaa. Tassani Trumpip statsministeri Mette Frederiksen, Naalakkersuisut siulittaasuat Kim Kielsen Savalimmiunilu lagmandi naapittussaagaluarpai.