Trumpip sumiiffinni aporaaffiusuni sakkutuut angerlartinniarai
USA-p præsidentiata Donald Trumpip sumiiffinni arlalinni aporaaffiusuni sakkutuut angerlartittuarsinnarpai.
Præsidentip Somaliami sakkutuut tamangajaasa angerlartinneqarnissaat piumasarisimagaa Amerikap illersornissaqarfiani Pentagonimi sulisut tallimanngornermi paasissutissiissutigaat.
Angerlartitsinerit januaarip ulluisa 15-iat nallertinnagu pissapput.
Amerikami aviisi The Wall Street Journal taama allaaserisaqarpoq.
USA peqqarniisaarnianut al-Qaedap Afrikami immikkoortortaqarfia al-Shabaab akiorniarlugu Somaliami ukiuni 13-ini sakkutooqarpoq.
Sakkutuut 700 missaanniittut Somaliap nunat sanilerisaanut Kenyamut Djiboutimullu nuutsinneqassapput.
Donald Trumpip Irakimit Afghanistanimiillu sakkutuut nuutsinneqarnissaat sapaatit akunneri arlaqanngitsut matuma siorna kalerriutigaa, taamaasilluni Afghanistanimi sakkutuut 2000-it Irakimilu sakkutuut 500-it qaammatit tulliuttut marluk ingerlaneranni nunanit taakkunanit aallartinneqassallutik.
